'चीन, भारत र अमेरिकासँग समान सम्बन्ध हुनुपर्छ'

काठमाडौं - चिनियाँ राष्ट्रपति सी चिनफिङको नेपाल भ्रमणका विषयमा समाजवादी पार्टीका अध्यक्ष डा.बाबुराम भट्टराईले विभिन्न सुझाव दिएका छन्।

पूर्वप्रधानमन्त्रीसमेत रहेका डा. भट्टराईसँग सरकारलाई ६  बुँदे सुझाव दिएका हुन्। आफ्ना सुझावलाई भट्टराईले ट्विटरमार्फत सार्वजनिक गरेका छन्। चीन, भारत र अमेरिकासँग समानान्तर सम्बन्ध राख्नुपर्ने उनको भनाइ छ।

भट्टराईका सुझाव जस्ताको तस्तै :

महामहिम चिनियाँ राष्ट्रपतिको आसन्न नेपाल भ्रमणको सन्दर्भमा सरकारले मागेअनुसार यस्तो सुझाव दिइयो।

१‍‍. मुख्यत: चीन, भारत र अमेरिकाको नेपालमा बढ्दो चासोलाई अवसरका रूपमा लिने, तीनवटैसँग समानान्तर सम्बन्ध राख्ने, गतिशील शान्तिवाद र तटस्थताको नीति लिने, बिआरआई र आइपिएस दुवैबाट लाभ लिने, भारत-चीनबीच, आर्थिक सेतुको रूपमा विकास गर्ने
२. चीनसँग रेल, सडक आदि कनेक्टिभिटी विस्तारमा जोड दिने, रेल बनाउँदा ऋणजालमा नफस्ने, अनुदान र ऋणको सन्तुलन मिलाउने, सडकमा बढी जोड दिने, कर्णाली-गण्डकी-कोसी कोरिडोरलाई प्राथमिकता दिने,
३. ऋण र अनुदान भन्दा औद्योगिक लगानी, व्यापार, पर्यटनमा ज़ेड दिने
४. सुपुर्दगी सन्धि चीनसँग मात्र तत्काल नगर्ने,
५. लिपुलेकको त्रिदेशीय व्यापार मार्गमा भारत-चीनले मात्र सम्झौता गरेकोमा सच्याएर त्यसमा नेपाल पनि जोडिनुपर्ने,
६. सन्१९६०को नेपाल-चीन मैत्री-सन्धि अध्यावधिक गर्ने प्रस्ताव चीनले राखेको भए दुवै पक्षको हितमा संशोधन गर्ने