भित्र्याइयो फूलपाती, सुरु भयो दसैँको उल्लास

नेपाल समय | आइतबार, पुस १६, २०७४

नेपाल समय

आइतबार, पुस १६, २०७४

काठमाडौं - दसैँको सातौँ दिन शनिबार हनुमानढोकास्थित दसैँघरमा धार्मिक विधिपूर्वक फूलपाती भित्र्याइएको छ।

हनुमानढोका दरबार सङ्ग्रहालय विकास समितिको व्यवस्थापनमा गुर्जुको पल्टन, पञ्चेबाजाका साथमा सुरक्षाकर्मीसहित टोलीले गोरखाबाट जमलमा ल्याइएको फूलपाती हनुमानढोकास्थित दसैँघरमा भित्र्याइएको हो।

फूलपाती भित्र्याउने कार्यक्रममा संस्कृति, पर्यटन तथा नागरिक उडड्यनमन्त्री योगेश भट्टराईसहित निजामती सेवाका कर्मचारी र विभिन्न देशका कूटनीतिज्ञको सहभागिता थियो ।
गोरखाबाट धादिङको जीवनपुरसम्म दसैँघरका पुजारीले र जीवनपुरबाट जमल (त्रिचन्द्र क्याम्पस परिसर) सम्म काठमाडौँबाट गएका प्रतिनिधिले फूलपाती ल्याउने चलन छ। निकै रमाइलो देखिने उक्त समारोहमा नेपाली सेनाले तोप पडकाएर हर्षबढाइँसमेत गरेको थियो।

शुभ साइतको प्रतीकका रुपमा केराको बोट, दारिम, धानको बाला, हलेदो, मानवृक्ष, उखु, बेलपत्र, अशोकको फूल र जयन्तीलाई भित्र्याइन्छ। केरामा ब्रह्माणी, दारिममा रक्तदन्तिका, धानमा लक्ष्मी, हलेदोमा दुर्गा, मानवृक्षमा चामुण्डा, उखुमा कालिका, बेलपत्रमा शिवा, अशोकमा शोकरहिता र जयन्तीमा कात्तिकी देवीको प्रतीकका रुपमा पूजा गरिन्छ।

आश्विन शुक्ल प्रतिपदाका दिनमा वैदिक विधिपूर्वक घटस्थापना गरी जमरा राखेपछि सुरु हुने नेपालीको महान् चाड दसैंको सामाजिक चहलपहल बढेको छ । आजैदेखि सरकारी कार्यालय बिदा भएको छ । विभिन्न पेसा र व्यवसायमा संलग्न मानिस सपरिवार बसेर दुर्गा भवानीको प्रसादका रुपमा टीका थाप्न आआफ्नो घर फर्कन थालेका छन् ।

राजधानी उपत्यकालगायत सहरी क्षेत्र सुनसान हुन थालेको छ । दसैँ मनाउन देशका विभिन्न ठाउँबाट राजधानी आएकाहरु आफ्नो पुख्र्यौली घर फर्किएका छन् । ग्रामीण भेगमा दोबाटो, चौतारो र चौबाटामा हालिने लिङ्गे पिङ र रोटे पिङले दसैंको रौनकता बढाएको छ।

प्रकाशित: Dec 31, 2017| 18:23 आइतबार, पुस १६, २०७४