बाँस्कोटा भन्छन् : 'व्यक्तिले गरेको गल्ती पार्टीले बोक्दैन'

काठमाडौं - सञ्चार तथा सूचना प्रविधिमन्त्री तथा सरकारका प्रवक्ता गोकुलप्रसाद बाँस्कोटाले वर्तमान समय विकास निर्माणको समय भएकाले समृद्ध नेपालतर्फ लम्किने जोकोही कतै अल्मलिन नहुने बताएका छन्। नेकपा बनेपा नगरद्वारा आयोजित कार्यक्रमलाई सम्बोधन गर्दै बाँस्कोटाले कसैले पनि सरकारको समृद्धि पथलाई रोक्न नसक्ने बताए। “काग कराउँदै गर्छ, कसैले स्याल हुइँया मच्चाए पनि सरकारको अभियानमा रोकतोक हुन्न, तपाईहरु ढुक्क हुनुहोस्।”, उनले भने।

सरकारको यो शिलान्यासको वर्ष र अर्को उद्घाटनका वर्ष भएको चर्चा गर्दै उनले भने, '२२ वर्ष सत्ता चलाउनेको ‘रिजल्ट’ नचाहिने, वर्तमान सरकारको एक वर्षमै रिजल्ट चाहियो भन्ने। यो गलत हो।'

मन्त्री बाँस्कोटाले नेकपा न्यायपूर्ण सोचाइ, दृष्टिकोण, समतामूलक विकास गर्ने राजनीतिक इच्छाशक्ति भएको पार्टी भएको दाबी गरे। उनले महरा प्रकरणलाई अप्रत्यक्ष रुपमा सम्बोधन गर्दै भने, “व्यक्तिले गरेको गल्तीको भागीदार स्वयं व्यक्ति नै हुन्छ, पार्टी भनेको ठूलो महत्व बोकेको संवेदनशील सङ्गठीत संस्था हो।” 

मन्त्री बाँस्कोटाले वर्तमान प्रधानमन्त्री कुनै महाराजाको छोरा नभइ स्वतन्त्रताका लागि लडेको, लामो जेलजीवन बिताएको व्यक्ति भएको बताए। “उहाँ हली–किसानको छोरा हुनुहुन्छ, उहाँलाई जनताका दुःखपीर मर्का सबै अनुभव छ, तीनलाई कसरी सुखी र खुशी बनाउने भनेर उहाँ सोचिरहनुहुन्छ, हामी पनि उहाँको सपनालाई साकार पार्ने अभियानमै छौँ।”, उनले भने।