सरकारले बिदाको दिनमा पनि बजार अनुगमन गर्ने

काठमाडौं- सरकारले बिदाको दिनमा पनि बजार अनुगमन गर्ने भएको छ । 

गृह मन्त्रालयले सार्वजनिक बिदाका दिनमा समेत नियमित बजार अनुगमन गर्ने जनाएको हो । उसले कुनै समस्या भएमा, ठगी भए र कानूनविपरीतको कार्य भए प्रहरीलाई खबर गर्न समेत आग्रह गरेको छ ।  

केही गुनासो भएमा देशैभरि प्रहरीको १००, उपत्यकाको १०३, सशस्त्र प्रहरीको १११४ नम्बरमा फोन गरेर जानकारी गराउन गृह मन्त्रालयले विज्ञप्ति जारी गरी जनाएको छ ।
 
आपसी सद्भाव, मित्रता अभिवृद्धि गर्ने गरी सांस्कृतिक मान्यताअनुसार चाडपर्व मनाउन आग्रह गर्दै मन्त्रालयले चाडपर्व लक्षित सुरक्षा योजना बनाएर कार्यान्वयन गरिएको सूचनामार्फत जनाएको छ । 

मन्त्रालयले यातायात व्यवसायी, थोक तथा खुद्रा विक्रेतालाई आम उपभोक्ताको सेवा पुर्‍याउन अनुरोध गरेको छ । अनुचित फाइदा लिने मनसायले ठगी गर्ने, कानून मिच्ने, गुणस्तरहीन सामान बिक्री गर्ने, कृत्रिम अभाव सिर्जना गर्ने र कालोबजारी गर्नेलाई कानूनअनुसार कारवाही गर्ने मन्त्रालयले चेतावनी दिएको छ ।