महरा काण्ड : रोशनीले २४ घन्टामै फेरिन् बयान 

काठमाडाैं- नेता कृष्णबहादुर महराले निर्घात कुटपिट गर्दै बलात्कार गरेको आरोप लगाएकी संसद् सचिवालयकी कर्मचारी रोशनी शाहीले २४ घण्टा नबित्दै आफ्नो बयान फेरेकी छिन् । 

उनले सोमबार हाम्राकुरा अनलाइनसँग कुरा गर्दै महराले आइतबार राति आफूलाई रक्सी खुवाएर कुटपिट गर्दै बलात्कार गरेको आरोप लगाएकी थिएन् ।

तर, त्यसको २४ घण्टा बित्न नपाउँदै उनले नागरिक खबर अनलाइनसँगको कुराकानीमा आइतबार राति महरा आफ्नो कोठामै नआएको दाबी गरेकी छिन् । 

शाहीले महरा आफ्नो बाबु समान भएको र बाहिर आएजस्तो त्यस्तो केहि पनि नभएको बताएकी छिन् ।

हेर्नुहोस दुबै अनलाईनसँग गरेको कुराकानीको संक्षिप्त अंश 

सोमबार हाम्रा कुरासँग भनिन्- महराले बलात्कार गरे 

उहाँ (सभामुख महरा)ले साँझ ७ बजे ‘म आउँछु’ भनेर फोन गर्नुभयो । केहीबेरमा रक्सी बोकेर आउनुभयो, आज दसैँ मनाऊँ भन्नुभयो । पहिल्यै खाएर आउनुभएको रहेछ, फेरि दुई गिलास खानुभयो । 
कोठामा पस्नेबित्तिकै जबर्जस्ती गरेपछि ममाथि कुटपिट पनि भयो । कुटाइले जिउ थिलथिलो भएको छ । योभन्दा पहिले पनि उहाँबाट ममाथि दुव्र्यवहारको प्रयास भएको थियो ।

उहाँलाई मैले ०४७ सालदेखि नै चिनेकी हुँ । रोल्पा हुँदा उहाँकै घरमा बस्थेँ । त्यहाँ बस्दा फेमेलीजस्तै भइसकेको थियो । यतिसम्म गर्नुहोला भन्ने सोच्या थिइनँ । प्रहरी बोलाउँछु भनेपछि मात्रै उहाँ जानुभयो । ‘यतिसम्म गरिस्, कि तँ हुँदैनस्, कि म रहन्नँ’ भनेपछि जानुभएको हो ।

उहाँले (महरा)ले कति वेला आऊँ, के गरौँ भनेर जतिवेला पनि त्यही कुरा गर्नुहुन्थ्यो । त्यो भन्दा मलाई मनै पर्दैन थियो । 

मंगलबार नागरिक खबरसँग भनिन्– महरा मेरो बाउसमान मान्छे, त्यस्तो केहि भएको छैन् 

 उहाँ (सभामुख महरा) मेरो डेरामा आउनुभएकै छैन, नआएको मान्छेलाई आएको भनेर कसरी भन्नू ? संसद्मा उहाँको प्रेसर जाँच्ने क्रममा भेट हुने हो, कहिलेकाहीँ फोनमा पनि कुरा हुन्छ ।
 
 मैले उहाँलाई मेरो बुबाजस्तै सोच्छु । उमेर पनि बाउकै जस्तो छ । त्यही भएर मैले उहाँलाई बाउलाई गर्नुपर्ने रेस्पेक्ट गर्छु । बाउछोरीकै नातामा कसैले शंका गर्छ र त्यसमा अनेकथरी कुरा गर्छ भने त्यसमा मलाई कुनै लेनादेना छैन, तिनीहरूले नै भोग्नुपर्ला । 

 मैले एकपटक सभामुखज्यूसँग हाम्रो समायोजनबारे कुरा गरेकी थिएँ । मेरो समायोजन निकै दुर्गम ठाउँमा भाको छ, त्यो मिलाइदिनुहोला भनेकी थिएँ । ‘हुन्छ, हुन्छ’ भन्नुभएको थियो, तर गर्नुभएन । त्यसपछि मलाई पनि रिस उठ्यो । म अलिकति डिप्रेसनमा पनि छु । औषधि खाइरहेकी छु । समायोजनको विषयमा उहाँसँग फोनमा झगडा पनि भयो ।
 
हिजो मलाई मिडियामा त्यस्तो बोल्न प्रभावित पारेको मेरै रिसले हो, अरू कसैले होइन । डिप्रेसनको औषधि पनि हाइडोजमै लिइरहेकी थिएँ । रिसकै तालमा प्रहरीलगायत क-कसलाई फोन गरे थाहा छैन । तर, अहिले सुनियोजित तरिकाले उहाँलाई पदच्युत गरेर त्यसमा आफू ‘स्टाब्लिस’ हुने खालको माहोल मैले देखेँ ।