रियलमाथि भिलारियलको ५ गोल

काठमाडौं - स्पेनिस ला लिगाअन्तर्गत भिलारियलले रियल बेटिसमाथि फराकिलो जित निकालेको छ। शुक्रबार राति भएको खेलमा भिलारियलले रियाल बेटिसमाथी ५-१ को फराकिलो जित निकालेको हो। 

भिलारियलको जितका लागि कार्ल टोको एकाम्बिले दुई तथा सेन्टी कार्जोला, गेरार्ड मोरेनो र स्यामुएल चुक्युवजेले एक एक गोल गरे। खेलको ३९औं मिनेटमा एकाम्बीले गोल गर्दै भिलारियललाई पहिलो हाफमा १-० को अग्रता दिलाए। त्यसपछि दोस्रो हाफमा थप चार गोल गर्दा एक गोल खान पुगेको थियो। 

४८औं मिनेटमा रियल बेटिसका इमर्सनले गोल गर्दै खेल बराबरीमा ल्याएका थिए। तर खेलको अन्तिमको करिब २० मिनेट सम्हालिन नसक्दा रियलले फराकिलो पराजय भोगेको हो। ६८औं मिनेटमा कार्जोलाले पेनाल्टीमा गोल गर्दै भिलारियललाई पुन: अग्रता दिलाए। ७६औं मिनेटमा एकाम्बीले व्यक्तिगत दोस्रो गोल गर्दै खेल ३-१ को स्थितिमा पुर्‍याए। त्यसपछि इन्जुरी समयमा थप दुई गोल गर्दा मोरेनोले र चुक्युवजेले एक एक गोल गरे। 

जितसँगै ७ खेलबाट ११ अंक जोडेको भिलारियल लिग तालिकाको पाँचौँ स्थानमा छ भने पराजित रियाल बेटिस समान खेलबाट ८ अंक बटुल्दै नवौं स्थानमा सीमित छ।