नयाँ नेतृत्व छान्न क्यानको साधरण सभा आज 

काठमाडौं- नेपाल क्रिकेट संघ क्यानको साधारण सभा आज (शुक्रबार) सुरु हुँदैछ। दुई दिन चल्ने साधरण सभाले क्यानको नयाँ नेतृत्व चयन गर्नेछ । 

अन्तराष्ट्रिय क्रिकेट परिषद (आइसिसी) ले क्यान निलम्बन गरेको झण्डै साढे ३ बर्षपछि क्यानको नयाँ नेतृत्वका लागि निर्वाचन हुन लागेको हो। सरकारी हस्तक्षेप र अवैधानिक चुनावको कारण देखाउँदै आईसीसीले नेपाल क्रिकेट संघलाई निलम्बन गरेको थियो। 

पहिलो दिन सभाको उद्घाटन सत्र र निर्वाचन सम्बन्धि कार्यविधि तय हुनेछ भने दोश्रो दिन निर्वाचन प्रक्रिया सुरु हुनेछ। 

साधारण सभामा क्यानको जिल्ला र प्रदेशबाट ५९ सदस्य प्रतिनिधि काठमाडौं आएका छन्। सदस्य संख्याको बहुमतले क्यानको नयाँ नेतृत्व चयन गर्नेछ।

नयाँ नेतृत्वका लागि चतुरबहादुर चन्द र विनयराज पाण्डे प्यानल सहित चुनावी प्रतिस्पर्धामा उत्रने तयारी गरेका छन्। साधारण सभाबाट नयाँ नेतृत्व चयन भएसँगै क्यान निलम्बनको ढोका खुल्ने अपेक्षा गरिएको छ ।