सरकारमा रहेर संविधानको विरोध गर्नु निर्लज्जताको पराकाष्ठाः गगन थापा

जनकपुरधाम–  प्रमुख प्रतिपक्षी दल नेपाली कांग्रेसका केन्द्रीय सदस्य गगन थापाले प्रदेश– २ का मुख्यमन्त्री लालबाबु राउतलाई आफ्नो पार्टी अध्यक्ष उपेन्द्र यादवसँग भिडेर देखाउन चुनौती दिएका छन् ।

मंगलबार जनकपुरमा आयोजित पत्रकार सम्मेलनमा थापाले भने, “हरबखत संघीय सरकारको विरोध गर्ने मुख्यमन्त्रीले संघीय सरकारका उपप्रधानमन्त्री रहेका पार्टी अध्यक्षसँग भिड्ने बुता देखाउन सक्नु पर्दछ ।”

संघीय र प्रदेश दुबै सरकारमा रहेर पनि संविधान दिवस नमनाएको प्रसंग कांग्रेस नेता थापाले उप्काएका थिए । 

उनले भने, “नेपालको संविधानअनुसार मुख्यमन्त्री बत्रु भएको छ । उहाँकै पार्टी अध्यक्ष संघीय सरकारमा उपप्रधानमन्त्री हुनुहुन्छ, अनि संविधानको विरोध गरेर हिँड्नु हुन्छ। सरकारमै बसेर संविधानको विरोध गर्नु विरोधाभाष र निर्लज्जताको पराकाष्ठा हो।” 

अधिकारको लागि लडिरहेको भन्दै जनतालाई भ्रममा नपार्न प्रदेश सरकारलाई आग्रह गर्दै थापाले ताकत भए आफ्ना अध्यक्षसँग लडेर संघीय सरकारबाट हट्न चुनौती दिए ।

यद्यपि, थापाले संविधानमा केही कमजोरी रहेको स्वीकार गर्दै संविधानको रक्षा र त्यसमा आवश्यक संशोधनको लागि आफूहरु प्रयासरत रहेको बताएका थिए ।

अहिले संविधानमाथि संकट आएको बताउँदै उनले ‘कम्युनिस्टको सरकार मुलुकलाई नै बर्बाद बनाउन उद्दत रहेको’ आरोप लगाए । 

उनले भने, “कांग्रेस चुप लागेर बस्दैन, संविधानको रक्षा गर्न हामी सदैब अग्रमोर्चामा रहने छौं ।” 

सरकारले कम्बोडियाको हुन्सन मोडेललाई पछ्याउँदै संघीय लोकतान्त्रिक व्यवस्था अन्त्य गर्न खोजेको पनि उनले आरोप लगाए ।

थापाले सरकारप्रति व्यङ्ग्य गर्दै भने, “चिनियाँ नेतृत्व आउँदा चिनियाँ पक्षधर जस्तो भइहाल्ने, भारतीय प्रधानमन्त्री आउँदा भारतीय पक्षधर बनिदिने, यस्तो पनि कुटनीति हुन्छ ? जनतालाई झुक्याएर मुलुकलाई अलमलमा पार्ने काम भइरहेको छ ।”