राष्ट्रकवि माधव घिमिरे १०१ वर्षमा 

काठमाडौं- राष्ट्रकवि माधव घिमिरे आजबाट १०१ वर्षमा प्रवेश गरेका छन्। घिमिरे १९७६ असोज ७ गते लमजुङको पुस्तन गाउँमा जन्मिएका हुन्। 

१९९२ सालमा गोरखापत्रमा ‘ज्ञानपुष्प’ शीर्षकको कविता प्रकाशनपछि साहित्यमा प्रवेश गरेका घिमिरे साहित्यमा अझै क्रियाशील छन्। उनी अहिले ‘ऋतम्भरा’ महाकाव्य लेखनमा व्यस्त छन् । यसको लेखन यस वर्ष सक्ने उनको योजना छ।     

उनले कविता, गीत, गीतिनाटक पनि रचना गरेका छन्। उनका ‘बमञ्जरी’, ‘घामपानी’, ‘नयाँ नेपाल’, ‘किन्नर–किन्नरी’ प्रमुख कविता–कृति हुन्। यस्तै ‘गाउँछ गीत नेपाली’, ‘लाग्दछ मलाई रमाइलो मेरै पाखा पखेरो’, ‘आजै र राति के देखें सपना’, ‘फूलको थुँगा’ लगायत गीत प्रमुख छन्।  

नेपाली साहित्यमा विशिष्ठ योगदान पुर्याएको भन्दै उनले थुप्रै पुरस्कार र सम्मान पाएका छन्। ८५ वर्षको उमेरमा ‘राष्ट्रकवि’को उपाधि पाएका उनी २०७५ सालमा महाउज्ज्वल पदकबाट पनि सम्मानित भएका छन्। २०६७ सालमा पद्यश्री साधना सम्मान पुरस्कार पाएका छन्। 

‘राष्ट्रकवि एक सय एक कविको आँखामा’ लोकार्पण 

राष्ट्रकविको जन्मदिनको पूर्वसन्ध्यामा सोमबार ‘राष्ट्रकवि एक सय एक कविको आँखामा’ कविता संग्रहको लोकार्पण गरिएको थियो ।

कविता संग्रहको लोकार्पण नेपाल-प्रज्ञा प्रतिष्ठानका कुलपति गंगाप्रसाद उप्रेतीले गरे। कविता संग्रहमा एक सय एक कविले राष्ट्रकविको व्यक्तित्व र कृतित्वबारे कविता लेखेका छन् ।