श्रीमतीले आत्महत्या गरेको ६ महिनापछि छोरीसहित आत्महत्या

धनगढी - श्रीमतीले झुण्डिएर आत्महत्या गरेको करिब ६ महिनापछि कैलालीमा एक युवकले छोरीलाई विष खुवाएर आफूले पनि विष सेवन गरी आत्महत्या गरेका छन्। गौरीगंगा नगरपालिका–५ का रामबहादुर कलेल र उनकी तीन वर्षीया छोरी अनुष्काले सल्फास नामक विष खाएका हुन्।  

गत वैशाख १६ गते रामबहादुरकी श्रीमती सरिताले झुण्डिएर आत्महत्या गरेकी थिइन्। श्रीमतीले आत्महत्या गरेपछि रामबहादुरविरुद्ध माइती पक्षले आत्महत्या दुरुत्साहनको मुद्दा हालेको थियो।
सरिताका माइती पक्षले दुरुत्साहनमा मुद्दा दर्ता गरेपछि जेठ २६ गते जिल्ला अदालत कैलालीले कलेललाई पूर्पक्षका लागि थुनामा पठाएको थियो।

साउन २२ गते अदालतले निर्दोष ठहर गरेपछि कलेल छुटेका थिए। छुटेको झण्डै डेढ महिनापछि उनले छोरीसहित आत्माहत्या गरेको जिल्ला प्रहरी कार्यालय कैलालीका प्रवक्ता डीएसपी दक्षकुमार बस्नेतले जानकारी दिए। घटनाबारे अनुसन्धान सुरु गरेको बस्नेतले जानकारी दिए।