म्याग्दीमा बाढीले दुई बालिका बगायो, विद्यालयसहित ८ घर पुरिए

म्याग्दी- भिषण वर्षापछि शनिबार राति बेनी नगरपालिका-२, स्थित कोटखोलामा आएको बाढीले बगाउँदा दुई बालिका बेपत्ता भएका छन्।

बाढीले बगाउँदा स्थानीय १० वर्षीया प्रविना परियार र ठूली आमाको घरमा पाहुना बस्न आएकी ७ वर्षीया अनुस्का परियार बेपत्ता भएकी हुन्।

उनीहरूको खोजी भइरहेको प्रहरीले जनाएको छ। 

प्रविना स्थानीय बेनी माध्यमिक विद्यालयमा कक्षा ४ मा अध्ययनरत छिन्। अनुस्का पनि सोही विद्यालयमै अध्ययनरत छिन्। 

यस्तै, बाढीले एक विद्यालयसहित ८ घर ध्वस्त पारेको छ । बाढीले बुद्ध बोर्डिङ सेकेण्डरी स्कुल ध्वस्त पारेको हो। स्कुलको होस्टेल भवनको भुइँ तलामा क्षति पुगे पनि होस्टेलका सबै ३० विद्यार्थी भने सकुशल छन्।

बाढीले दीपक जुग्जालीको घर, पसल र कुखुरा फार्म, सेते सार्की, कलिमान दर्जी, रामाया परियार, पार्वती परियार, गुप्ते दर्जी र रेशम दर्जीको घर बगाएको स्थानीयले बताएका छन्।