'बलात्कारी मन्त्री चाहिँदैन' भन्दै कर्णालीमा मुख्यमन्त्री कार्यालय घेराउ

सुर्खेत– युवा संघ सुर्खेत र अनेरास्ववियू सुर्खेतले कर्णाली प्रदेश सरकारको मुख्यमन्त्री कार्यालय घेराउ गरेको छ।

बलात्कारको आरोप लागेका भूमि व्यवस्था, कृषि तथा सहकारी मन्त्री कुर्मराज शाहीलाई बरखास्तीको माग गर्दै उनीहरुले कार्यालय घेराउ गरेका हुन्। 

एमाले पार्टी कार्यालयबाट जुलुससहित मुख्यमन्त्री कार्यालय पुगेका उनीहरुले बलात्कारी मन्त्री चाहिँदैन, मन्त्रीलाई बरखास्ती गर जस्ता नारा जुलुस गरिरहेका छन्।

एक महिलाले २०७६ माघमा मन्त्री शाहीले बलात्कार गरेको आरोप लगाएकी थिइन्। घटनाबारे सञ्चारमाध्यममा समाचार प्रकाशित भएपछि भने ती महिलाले मन्त्रीमाथिको आरोप निराधार भएको प्रतिक्रिया दिएकी छन्।

मन्त्रीको सचिवालले घटनाको कुनै सत्यता नभएको दाबी गर्दै आएको छ। सचिवालयले ती महिलाले आर्थिक लाभका लागि मन्त्रीलाई बलात्कार आरोप लगाएको बताउँदै आएको छ। घटना बाहिरएपछि प्रमुख प्रतिपक्ष दल नेकपा एमालेले मन्त्रीले नैतिकताका आधारमा मन्त्रीलाई बरखास्त गर्न माग गरेको छ।

सत्ता साझेदार नेपाली कांग्रेसले पनि घटनाको सत्यतथ्य छानविन गर्नुपर्ने माग गरेको छ। सुर्खेतका विभिन्न संघसंगठनले पनि बलात्कारको आरोप लागिसकेपछि मन्त्रीले नैतिकताका आधार राजीनामा दिनुपर्ने बताउँदै आएका छन्।