७० वर्षीय महिला हत्याका अभियुक्त १७ वर्षपछि पक्राउ 

काठमाडौं- स्थानीय ७० वर्षीय महिलाको हत्या अभियोग लागेपछि फरार भएका व्यक्तिलाई केन्द्रीय अनुसन्धान ब्युरो (सीआइबी)ले १७ वर्षपछि पक्राउ गरेको छ। 

सिआइबीले नुवाकोट, ककनी-७, सिम्लेका भरत सुनारलाई गोप्य सूचनाका आधारमा चितवन, राप्ती नगरपालिका-७, भवानी बजारबाट पक्राउ गरेको हो। 

सुनारलाई स्थानीय ७० वर्षीय पदमकुमारी गुरुङको हत्या गरेको अभियोग लागेको छ। 

२०५९ माघ २१ राति स्थानीय लालबहादुर तामाङको छोराको छेवर (व्रतबन्धअगाडि कपाल काट्ने कार्यक्रम)मा गएकी गुरुङको शव मकैबारीमा भेटिएको थियो । उनको सोही राति ढुंगाले हानेर हत्या गरिएको प्रहरीको आशंका छ । उनको शरीरको तल्लो भाग निर्वस्त्र अवस्था फेला परेको थियो । घटनास्थलबाट सुनारको कालो पाइन्ट, खैरो पेटी तथा घडी फेला परेको थियो। 

शव भेटिएलगत्तै मृतकका छोराले भरतविरुद्ध प्रहरीमा किटानी जाहेरी दिएपछि उनी फरार भएका थिए। त्यसयता उनी नेपाल र भारतका विभिन्न स्थानमा लुकेर बसेका थिए। 

घटनाको थप अनुसन्धानका लागि सुनारलाई जिल्ला प्रहरी कार्यालय, नुवाकोट पठाइएको सिआइबीका प्रवक्ता वेलबहादुर पाण्डेले जानकारी दिए ।