पहिरोले अरनिको राजमार्ग ठप्प

अविरल वर्षाका कारण अरनिको राजमार्गअन्तर्गत पाँचखाल नगरपालिकाको ५४ किलो र भुम्लु गाउँपालिकाको दोलालघाट बजार आसपासमा यातायात अवरुद्ध भएको छ ।

जिल्ला प्रहरी कार्यालय काभ्रेपलाञ्चोकका प्रमुख प्रहरी उपरीक्षक जयराज सापकाटोका अनुसार भुम्लु गाउँपालिका–१० दोलालघाट बजार नजिकै गएराति पहिरो गएपछि यातायात बन्द भएको हो । 

“अरु ठाउँमा पनि सडक भत्किएको र भासिएको छ”, उनले भने, “धेरै ठाउँमा सडक अवरुद्ध छ, यातायातका साधन चल्न सकेका छैनन् ।”

गाउँपालिकाका अध्यक्ष गुमानध्वज कुँवरले दोलाघाट बजार नजिकै पहिरो गएको भन्ने खबर प्राप्त हुनासाथ डोजर लगाएर खुलाउने प्रयास भइरहेको बताए। 

उता रोशी गाउँपालिकाअन्तर्गत बीपी राजगर्माको ल्हासकोटमा सडकमाथिबाट खसेको लेदोका कारण हिजोदेखि अवरोध भएको सडक गाउँपालिकाको पहलमा सञ्चालन भएको छ । 

नमोबुद्ध नगरपालिका–५ ल्हासकोटमा सञ्चालित मनकामना एक्रिकेट क्रसर उद्योगले सडकमाथि भित्तामा थुपारेको डस्ट वर्षाका कारण बगेर सडक पुरिएको थियो ।