आज विश्वकर्मा पूजा 

काठमाडौं- असाेज संक्रान्तिका दिन आज ‘निर्माणका देवता’ मानिने भगवान विश्वकर्माको धुमधामसँग पूजाआजा गरिँदैछ । यस दिनलाई विश्वकर्मा जयन्ती पनि भनिन्छ । 

यस दिन कलकारखाना, यन्त्र, औजार, सवारीसाधनलगायतको पूजा गरिन्छ । ज्योतिषीका अनुसार पूजाको शुभ साइत बिहान ७ः१७ देखि ३ः१५ सम्म रहेको छ । 

को हुन् भगवान विश्वकर्मा ? 

पौराणिक कालमा भगवान विश्वकर्माले देवताका लागि भव्य महल, हतियार तथा सिंहाशन बनाएको मान्यता छ । उनले भगवान शिवका लागि त्रिशूल, भगवान विष्णुका लागि सुदर्शन चक्र, स्वर्गलोकका राजा इन्द्रका लागि बज्र, यमराजका लागि कालदण्डलगायत बनाएका थिए । यस्तै, रावणको लंका, कृष्णका लागि द्वारिका नगरी, पाण्डवका लागि इन्द्रप्रस्थ नगरी बनाएको हिन्दू धर्मग्रन्थमा उल्लेख छ । 

यसै श्रद्धाभावले विश्वकर्माको पूजा गर्ने परम्परा बसेको हो ।