एएफसी यु-१६ च्याम्पियनसिप छनोट : नेपाल कुवेतसँग बराबरी 

काठमाडौं- जोर्डनमा जारी एएफसी यु-१६ च्याम्पियनसिप छनोट अन्तर्गतको आफ्नो दोस्रो खेलमा नेपालले कुवेतसँग बराबरी खेलेको छ।

जोर्डनको जार्का सिटीस्थित प्रिन्स मोहम्मद अन्तर्राष्ट्रिय रंगशालामा सोमबार राति भएको खेलमा नेपालले कुवेतसँग १-१ गोलको बराबरी खेलेको हो। 

नेपालका लागि दिपेश राईले गोल गरे। उनले खेलको ७४औँ मिनेटमा गोल गर्दै नेपाललाई अग्रता दिलाएका थिए।

कुवेतका अब्दुलवाहब अलहिन्दिले खेलको इन्जुरी समयमा पेनाल्टीमा गोल गर्दै खेललाई १-१ गोलको बराबरीमा पुर्याए।

बराबरीसँगै समूह ‘ए’ मा रहेको नेपालले दुई खेलबाट एक अंक जोडेको छ । 

यसअघि पहिलो खेलमा नेपाल जोर्डनसँग ७-० ले पराजित भएको थियो। कुवेतले दुई खेलबाट तीन अंक जोडेको छ। पहिलो खेलमा कुवेतले श्रीलंकालाई हराएको थियो। 
प्रतियोगिताअन्तर्गत नेपालले आफ्नो तेस्रो खेल असोज ३ गते ताजकिस्तानसँग खेल्नेछ।

प्रतियोगितामा ४८ राष्ट्रले भाग लिएका छन्, जसलाई ११ समूहमा विभाजन गरिएको छ ।

समूहमा शीर्ष हुने टोली सन् २०२० मा आयोजना हुने एएफसी च्याम्पियनसिपका लागि छनोट हुनेछ । त्यस्तै उत्कृष्ट चार उपविजेताले पनि अन्तिम प्रतियोगिताका लागि अवसर पाउनेछ ।