साउदीको प्रशोधन केन्द्रमा आक्रमणपछि विश्वभर इन्धनको मूल्य बढ्न सक्ने

साउदी अरबमा सरकारी स्वामित्वका दुई ठूला तेल प्रशोधन केन्द्रमा आक्रमण भएपछि उसले तेल र ग्यास उत्पादनमा कटौती गरेको छ । 

साउदीका उर्जामन्त्री राजकुमार अब्दुल अजिज बिन सलामनले उक्त आक्रमणपछि दैनिक कच्चा तेल उत्पादनमा झण्डै आधा मात्र हुन थालेकोे बताएका छन् । 

साउदी अरबका तेल प्रशोधन केन्द्रमा ड्रोनबाट आक्रमण हुँदा आगलागी भएको थियो । यमनस्थित हूथी विद्रोहीका एक प्रवक्ताले आक्रमणको जिम्मा लिंदै १० वटा ड्रोन परिचालन गरेको दाबी गरेका छन् । 

यमनमा जारी गृहयुद्धमा त्यहाँको सरकारलाई साउदी अरब र पश्चिमा मुलुकहरुले सघाइरहेका छन् भने हूथी विद्रोहीलाई इरानको सहयोग छ । 

अमेरिकी विदेशमन्त्री माइक पोम्पेओले ती ड्रोन यमनबाट आएको भन्ने कुनै प्रमाण नभएको भन्दै इरानमाथि आक्रमणको आरोप लगाएका छन् । 

साउदी अरेबिया एक्लैले विश्व बजारको १० प्रतिशत कच्चा तेल उत्पादन गर्छ । उत्पादनमा आधाले कमी आउँदा सोमबारदेखि विश्व बजारमा तेलको मूल्यमा असर पर्नसक्ने जानकारहरुको अनुमान छ ।