फलाम उत्पादनको लागि कम्पनी दर्ता प्रकृया अघि बढ्यो

काठमाडौं–  सरकारले व्यवसायिक फलाम उत्पादनका लागि कम्पनी दर्ताको प्रक्रिया अगाडि बढाएको छ । 

खानी तथा भूगर्भ विभागले विहीबार फलामको व्यवसायिक उत्पादनका लागि कम्पनी रजिष्टारको कार्यालय त्रिपुरेश्वरमा ‘धौवादी फलाम खानी कम्पनी लि’  दर्ताको निवेदन दिएको हो । 

नवरलपरासी जिल्लाको धौवादीबाट संकलित चट्टानको चीनमा परीक्षण गर्दा फलाम खानीको राम्रो संभावना देखिएपछि सरकारले व्यवसायिक उत्पादनको प्रक्रिया अगाडि बढाएको हो । 

धौबादीमा फलामको ठूलो भण्डार देखिए पनि त्यो आर्थिक रूपमा सम्भव छ कि छैन भन्ने चाहिँ एकिन भइसकेको  छैन । विस्तृत अध्ययन तथा परीक्षण उत्खननबाट लागतको हिसाब आएपछि आर्थिक दृष्टिले यो खानी कत्तिको लाभदायक छ भन्ने थाहा लाग्ने छ ।

सो कम्पनी सरकारले सार्वजनिक र निजी साझेदारी अन्तर्गत स्थापना गरेको हो । 

आगामी आर्थिक वर्षदेखि नवलपरासीको धौवादीमा रहेको फलाम खानीबाट व्यवसायिक फलाम उत्पादन गर्न सरकारले चालु आर्थिक बर्षमा रु १ अर्ब बजेट विनियोजन गरेको छ । 

कम्पनीमा ५५ प्रतिशत सरकारी ४५ प्रतिशत नीजी क्षेत्रको शेयर रहने छ ।

कम्पनीको जारी पूँजी ४ अर्ब रुपैयाँ तोकिएको छ भने अधिकृत पूँजी १० अर्ब तोकिएको छ।