प्रवक्ताको गाडी र वडा कार्यालयमा आगजनी

कञ्चनपुर-  जिल्लाको शुक्लाफाँटा नगरपालिकाका प्रवक्ता जगतबहादुर सिंहको गाडीमा अज्ञात समूहले आगजनी गरेको छ ।

शुक्लाफाँटा नगरपालिका–७ का वडाध्यक्षसमेत रहेका सिंहको बा २१ च ८५०७ नम्बरको कारमा आगजनी भएको हो । 

शुक्लाफाँटा नगरपालिका–५ वनसमितिस्थित डेरामा पार्किङ गरी राखिएको अवस्थामा गएराति करीब १ बजेको समयमा आगजनी भएको प्रवक्ता सिंहले बताए ।

“मध्यरातमा आगो लगाएर फरार भएको देखिन्छ”, इलाका प्रहरी कार्यालय झलारीका प्रमुख प्रहरी निरीक्षक नैनसिंह साउदले भने “आगजनी गर्नेको खोजी भइरहेको छ ।”

वडा कार्यालयमा आगजनी

कञ्चनपुरकै भीमदत्तनगरपालिका–१९ बागफाँटास्थित वडा कार्यालयमा पनि बिहीबार राति आगजनी भएको छ । 

प्रहरी चौकी बागफाँटाका अनुसार वडाध्यक्षको कार्यकक्षमा भएको आगजनीबाट केही कागजात र  फर्निचर र अन्य सामानमा क्षति पुगेको छ ।

आगजनी गरिएको स्थलमा नेत्रविक्रम चन्द नेतृत्व समूहको सात बुँदे असहमतिसहितको पर्चा भेटिएको प्रहरीले जनाएको छ । 

प्रहरीका अनुसार पर्चामा स्थानीय तहमा भ्रष्टाचार बढेको, छाडा पशुचौपायाको व्यवस्थापन नगरिएको र सडक पूर्वाधार लगायतका काममा बेवास्ता गरेको भन्दै असन्तुष्टि व्यक्त गरिएको छ ।

मध्यरातमा आगजनी गरिएको भए पनि प्रहरीले भने आज बिहान ६ बजे खबर पाएको थियो । आगजनी गर्ने समूहको प्रहरीले खोजी गरिरहेको जनाएको छ ।