काठमाडौंको जोरपाटीमा ग्याङ फाइट : एक युवाको मृत्यु

काठमाडौंको जोरपाटीमा दु्ई समुहबीच भएको ग्याङ फाइटमा एक युवाको मृत्यु भएको छ । मृत्यु हुनेमा संखुवासभाको बारपोखरी ६ का १८ वर्षीय सञ्जय राई रहेका छन् ।
 
कुटपिटका कारण गम्भीर घाइते भएका सञ्जयको महाराजगन्जस्थित टिचिङ अस्पतालमा उपचारका क्रममा मंगलबार राति ११ बजे मृत्यु भएको महानगरीय प्रहरी परिसर टेकुका प्रवक्ता होबिन्द्र बोगटीले जानकारी दिए । मृतक सञ्जयको छातिमा गहिरो चोट लागेको थियो । 

सञ्जयको मृत्यु भएसँगै ग्याङ फाइटमा संलग्न २ युवालाई प्रहरीले पक्राउ गरेको छ। पक्राउ पर्नेमा संखुवासभाको फावाखोला ४ का प्रेमकुमार राई, इलामको चिटिढुङ्गा १ का शुसान राई रहेका छन् ।

दुबै जनालाई बुधबार (आज) बिहान कपन क्षेत्रबाट पक्राउ गरिएको  महानगरीय प्रहरी परिसर टेकुका प्रवक्ता बोगटीले जानकारी दिए । 

के कारणले झगडा परेको थियो भन्ने खुलेको छैन् । यद्यपी दुई समुहबीच जम्काभेट भएसँगै झगडा सुरु भएको अनुमान गरिएको  छ ।