तातोपानी नाका खुलेसँगै तस्करी सुरु

काठमाडौं - केही समयसम्म रोकिएको रक्तचन्दन तस्करी फेरि मौलाएको छ । प्रहरीको केन्द्रीय अनुसन्धान व्यूरो (सिआइबी) र महानगरीय प्रहरी बृत्त बौद्धको सहकार्यमा काठमाडौंको रामहीटीबाट प्रहरीले रक्तचन्दनसहित एक किलो यार्सागुम्बा पक्राउ गरेको छ । 

सिआइबीका अनुसार घरमा स्टोर गरेर राखेको अवस्थामा बुधबार साँझ यार्सा र रक्तचन्दन बरामद भएको हो। सिआइबीका अनुसार च्याङ्बा लामाको घरबाट रक्तचन्दन बरामद भएको थियो। 
सिआइबीका निर्देशक डीआइजी निरजबहादुर शाहीका अनुसार विशेष सुराकीका आधारमा सिआइबी र बौद्ध प्रहरीको संयुक्त टोलीले च्याङ्बासहित योन्देन ग्याङ्जु तामाङलाई पक्राउ गरेको हो।

बिक्रीका लागि राखिएको अवस्थामा प्रहरीले रक्तचन्दन पक्राउ गरेको हो। तर, त्यसको मालिक को भन्नेबारे थप अनुसन्धान भइरहेको प्रहरीले बताएको छ । रक्तचन्दनसँगै एक किलो यार्सागुम्बा पनि भेटिएको डिआइजी शाहीले जानकारी दिए । उनका अनुसार पछिल्लो समयमा तातोपानी नाका खुलेसँगै रक्तचन्दन र यार्सागुम्बाको तस्करी पनि विस्तारै मौलाउदै गएको छ ।