रवि पाँच लाख धरौटीमा रिहा

काठमाडौं - शालिकराम पुडासैनीको आत्महत्या दुरुत्साहन आरोपमा पक्राउ परेका रवि लामिछाने चितवन जिल्ला अदालतको आदेश अनुसार रु. ५ लाख धरौटी बुझाएर रिहा भएका छन् ।

न्यायाधीश हेमन्त रावलको इजलासले लामिछानेलाई पाँच लाख, युवराज कँडेललाई तीन लाख रुपैयाँ र अस्मिता कार्कीलाई साधारण तारेखमा रिहा गर्ने आदेश सुनाएको हो।

जिल्ला सरकारी वकिलको कार्यालयले लामिछाने, कँडेल र कार्कीलाई विपक्षी बनाउँदै आत्महत्या दुरुत्साहनको मुद्दा जिल्ला अदालत चितवनमा दायर गरेको थियो। आरोपीहरुको बयान र थुनछेक बहसपछि अदालतको फैसला आएको हो। 

योसँगै अदालतले लामिछानेलाई पुडासैनी आत्महत्या प्रकरणबारे कार्यक्रम बनाउनबाट पनि रोक लगाएको छ भने विदेश जानबाटपनि रोक लगाएको छ। विदेश जानु अघि जिल्ला अदालतको अनुमति लिनु पर्ने आदेश अदालतले दिएको छ। मुद्दाको फैसला नभएसम्मका लागि लामिछानेमाथि यो शर्त राखिएको हो।

उनीहरुविरुद्ध ५ वर्ष कैद र ५० हजार रुपैयाँ जरिवाना हुनुपर्ने माग गर्दै सरकारी वकिल कार्यालयले मुद्दा दायर गरेको थियो।