रवि लामिछानेसहित तीनै जनालाई न्यायिक हिरासत पठाइयो

काठमाडौं–  शालिकराम पुडासैनीलाई आत्महत्या गर्न दुरुत्साहन गरेको आरोप लागेका रवि लामिछाने सहित तीन जनालाई आज बयान नसकिएपछि न्यायिक हिरासतमा पठाइएको छ । 

जिल्ला सरकारी वकिल कार्यालय चितवनले  आत्महत्या गर्न दुरुत्साहन गरेको भन्दै टेलिभिजनकर्मी रवि लामिछाने, अस्मिता कार्की र युवराज कंडेलविरुद्ध जिल्ला अदालत चितवनमा आरोप पत्र दायर गरेको थियो । 

उनीहरुको मुद्दा दर्ता भएसँगै सुरु भएको बयान आज नसकिएपछि उनीहरुलाई आज पनि प्रहरी हिरासतमै पठाइएको छ । न्यायाधीश हेमन्त रावलको इजलासमा आज अस्मिता कार्कीको बयान गराइएको छ । 

समय अभावले आज लामिछाने र कंडेलको बयान हुन सकेन । सोमबार बिहानबाट हुने  उनीहरुको बयान सकिएपछि अदालतमा थुनछेक बहश शुरु हुनेछ। थुनछेक बहसपछि अदालतले उनीहरुलाई पूर्पक्षका लागि थुनामा पठाउने, तारेखमा वा धरौटीमा रिहा गर्ने भन्ने निर्णय गर्नेछ। 

सरकारी वकिलले दर्ता गराएको मुद्दामा उनीहरुलाई पाँच वर्ष कैद र ५० हजार जरिवाना हुनुपर्ने माग गरिएको छ।