अब स्थायी शिक्षक हुन प्रारम्भिक परीक्षा पास गर्नुपर्ने

काठमाडौं । अब स्थायी शिक्षक हुनका लागि प्रारम्भिक परीक्षा पास गर्नुपर्ने भएको छ ।

शिक्षक सेवा आयोग नियमावलीको १० औं संशोधनमा शिक्षक सेवा आयोगको परीक्षा लोक सेवा आयोगको परीक्षाजस्तै बनाउने प्रस्ताव गरिएको हो । जसअनुसार सामान्य (वस्तुगत) १०० र विषयगत १०० गरी २०० पूर्णांकको लिखित र २५ पूर्णांकको अन्तवार्ता परीक्षा हुनेछ । अर्थात् स्थायी शिक्षक हुन चाहनेले सुरुमा १०० पूर्णांकको प्रारम्भिक परीक्षा दिनुपर्नेछ, यसलाई नियमावलीको संसोधनमा सामान्य परीक्षा भनिएको छ । उक्त परीक्षामा पास भएपछि मात्रै विषयगत परीक्षा दिन पाइनेछ । 

अहिले १०० पूर्णांकको लिखित र २५ पूर्णांकको मौखिक परीक्षा हुन्छ । 

वस्तुगत परीक्षा ओएमआर कपीमा, पास गर्न ५० अंक 

संसोधनमा १०० पूर्णांकको वस्तुगत परीक्षा मेसिनले जाँच्ने ओएमआर कपीमा दिनुपर्ने प्रस्ताव गरिएको छ । जस अनुसार परीक्षामा पास गर्न कम्तिमा ५० अंक ल्याउनुपर्नेछ ।  

वस्तुगत परीक्षामा पास भएकाहररूको ५० प्रतिशत अंकमात्र विषयगत परीक्षाको प्राप्तांकमा जोडिने छ । र, दुवै परीक्षामा धेरै अंक ल्याउने परीक्षार्थी अन्तर्वार्ताका लागि छानिने छन् ।  

प्रस्ताव मन्त्रिपरिषद्को विधेयक समितिमा छलफलको क्रममा रहेको शिक्षा मन्त्रालयले जनाएको छ ।