सर्पको टोकाइबाट महिलाको ज्यान गयो 

धनगढी– कैलालीमा सर्पको टोकाइबाट एक महिलाको ज्यान गएको छ । 

जिल्लाको घोडाघोडी नगरपालिका–१, घोडाघोडीमा सर्पको टोकाइबाट ३२ वर्षीया रानीपुरा न्यौपानेको मृत्यु भएको हो ।

भान्सामा खाना पकाउदै गरेको बेला हातमा सर्पले टोकेपछि समयमै उपचार नपाउँदा उनको ज्यान गएको हो ।

सर्पले टोकेपछि उनी उपचारका लागि दौडिँदै नजिकैको सुखड बजारस्थित मेडिकल पुगेकी थिइन् । तर, मेडिकलले धनगढी जान सल्लाह दिएपछि मात्र उनलाई गौरिगंगा नगरपालिका, बडैपुरस्थित सर्पदंश उपचार केन्द्रमा पुर्याइएको थियो । 

केन्द्रले धनगढी सेती अञ्चल अस्पताल रिफर गरे पनि अन्तिम अवस्थामा रहेकाले उनको उपचार हुन नसकी त्यही निधन भएको स्थानीय धनलक्ष्मी शाहीले जानकारी दिइन् । रानीपुराका पति शंकर न्यौपाने चार दिनअघि मात्र रोजगारीका लागि भारत गएकाले छोराछोरीको बिचल्ली भएको शाहीले बताइन् । 

न्यौपानेका १०, ८, ५ र ४ वर्षका ४ छोरी छन् भने ७ महिनाका एक छोरा छन् ।