जम्मू–कश्मीर विवाद : भारत र पाकिस्तानी दूतावास अघि प्रदर्शन (फोटो फिचर)

काठमाडौं - जम्मू–कश्मीरको सवालमा तनाव बढ्दै गएको भन्दै काठमाडौंमा भारतीय दूतावास अगाडि प्रदर्शन भएको छ। मानव अधिकार तथा शान्ति समाजले भारतीय दूतावास र पाकिस्तानी दूतावास अगाडि प्रदर्शन गरेका हुन्।

युद्ध निषेधः शान्ति विशेष अभियान सञ्चालन गर्दै आएको शान्ति समाजले भारत र पाकिस्तानलाई युद्धको कुनै पनि संभावनालाई खारेज गर्न, दुई देशबीच वार्ताअघि बढाउन र ३४ वर्ष अगाडि स्थापना भएको दक्षिण एसियाली क्षेत्रीय सहयोग संगठन सार्कलाई सक्रिय बनाउन आग्रह गर्दै प्रदर्शन भएको छ। शत्रुतालाई अन्त्य गर्न र मित्रतालाई गहिरो बनाउन आह्वान पनि समाजले गरेको छ। 



काठमाडौं लैनचौरस्थित भारतीय दूतावास र महाराजगञ्जस्थित पाकिस्तानी दूतावास अगाडि दिउँसो २ बजेदेखी १ घण्टासम्म भएको धर्नामा शान्ति समाजका संस्थापक सभापति कृष्ण पहाडी, सभापति उत्तम पुडासैनीलगायत सहभागी थिए।

धर्नाको अन्त्यमा समाजका तर्फबाट भारतीय प्रधानमन्त्री नरेन्द्र मोदी र पाकिस्तानी प्रधानमन्त्री इमरान खानलाई लेखिएको पत्र दूतावासका वरिष्ठ अधिकारीहरुलाई हस्तान्तरण गरिएको थियो।