गौरासँगै भरिए रित्ता बस्ती 

धनगढी– गौरा पर्व सुरु भएसँगै सुदूरपश्चिममा चहलपहल बढेको छ । 

गौराका अवसरमा कामका लागि विदेसिएकाहरू घर फर्किएसँगै पहाडका रित्ता बस्ती भरिन थालिएको डोटीको आदर्श गाउँपालिकाका स्थानीय मदन ओझा बताउँछन् । 

‘घरबाहिर रहेकाहरू फर्किएसँगै गाउँमा रौनक बढेको छ,’ उनले भने । 

यो बेला व्यापार पनि बढ्ने गरेको स्थानीय व्यापारीहरुको भनाई छ । ‘गौराका बेला दैनिक कारोवार बढछ,’ कञ्चनपुर, कृष्णपुर–९, मा किराना पसल सञ्चालन गरिरहेका तपराज अवस्थीले भने । 

कामका लागि विदेसिएकाहरू आफ्नो कमाइसँगै घर फर्किंदा किनमेल बढी गर्छन् । 

देउडाको रौनक 

गौरा सुरु भएसँगै देउडाको रौनक पनि सुरु भएको छ । 

गौराकै अवसरमा विभिन्न संघसंस्थाले देउडा प्रतियोगिता आयोजनाको तयारी थालेका छन् । 

‘हाम्रो संस्कृति हाम्रो पहिचान नेपाल’ संस्थाले आगामी भदौ ७, ८ र ९ गते धनढीमा गौरा महोत्सव आयोजना गर्दैछ । सो अवसरमा प्रादेशिक देउडा प्रतियोगिता आयोजना गरिंदैछ । 

गौरा पर्वको जगेर्नाका लागि महोत्सव आयोजना गर्न लागिएको संस्थाका अध्यक्ष सुरत रावत ‘डोटेली कान्छा’ले बताए ।

‘यसबाट गौरा पर्वको जगेर्ना हुने आशा छ,’ उनले भने ।  

भदौ कृष्ण पञ्चमीमा गौरा पर्व मनाइन्छ । नेपालको सुदूरपश्चिमसँगै भारतको कुमाउ, गढवालतिर पनि यो पर्व धुमधामका साथ मनाइन्छ ।