सन्यासबारे अन्यौलमा गेल

एजेन्सी- भारतविरुद्धको तीन खेलको एकदिवसीय सिरिज पछि सन्यास लिन सक्ने बताइएका वेस्टइन्डिजका विस्फोटक ब्याट्सम्यान क्रिस गेल फेरि पनि यस विषयमा अन्यौल देखीएका छन् । सिरिजको तेस्रो खेल पछि गेलले अन्तर्राष्ट्रिय क्रिकेटबाट सन्यास लिने घोषणा नगरेको बताएका छन् । 

‘मैले सन्यास लिने घोषणा गरेको छैन् । घोषणा नगरेसम्म म राष्ट्रिय टोलीमै रहने छु,’ गेलले भने । त्यस्तै वेस्टइन्डिज क्रिकेट टोलीका कप्तान जोसन होल्डरले पनि गेलले सन्यास नलिएको बताएका छन् । 

‘मलाई जानकारी भएसम्म गेलले सन्यास लिएका छैनन् । तर, उनले सिरिजको अन्तिम खेलमा खेलेको उनको पारी एक उदाहरण हो । उनले दमदार पारी खेल्दै शानदार सुरुवा गराएका थिए । र हाल पनि उनी प्रति धेरैको आसा छ,’ होल्डरले भने ।

सिरिजको तेस्रो खेलमा वेस्टइन्डिज भारतसँग डकवर्थ लुइस नियमको आधारमा ६ विकेटले पराजित भएको थियो । गेलले उक्त पारीमा विस्फोटक ब्याटिङ गरेका थिए । उनले ४१ बलमा ८ चौका र ५ छक्काको मद्दतमा ७२ रनको अर्धशतकीय पारी खेलेका थिए ।