शैक्षिक रुपान्तरणको नारासहित युवा दिवस मनाईदै

काठमाडौं- शैक्षिक रुपान्तरणको नारासहित यस वर्षको अन्तर्राष्ट्रिय युवा दिवस मनाइदैछ। दिवसका अवसरमा नेपाल युवा संस्था सञ्जाल (आयोन) ले सप्ताहव्यापी कार्यक्रमको घोषणा गरेको छ।

प्रत्येक वर्ष अगष्ट १२ तारिखका दिन विश्वभर मनाइने युवा दिवसमा आयोनले पनि साताव्यापी रुपमा विभिन्न कार्यक्रम आयोजना गर्न लागेको हो।

कार्यक्रम अन्तर्गत आयोनले पहिलो दिन बुधबार फुटसल प्रतियोगिता आयोजना गरेको थियो। प्रतियोगितामा काठमाडौंका १६ संस्थाको सहभागिता थियो।

बिहीबार आयोनले स्थानीय तहमा युवा सहभागिता विषयमा युवा बहस कार्यक्रम आयोजना गरेको छ भने शुक्रबार शैक्षिक मुद्दामा शिक्षा क्षेत्रका विज्ञहरुसँग छलफल गर्ने कार्यक्रम रहेको आयोनका अध्यक्ष जगदीश ऐरीले जानकारी दिएका छन्।

उनका अनुसार आयोनसँग आबद्ध संस्थाहरुसँग मिलेर शनिवार मुख्य कार्यक्रमको आयोजना गरिनेछ। अगष्ट १२ का दिन सातै प्रदेशमा कार्यक्रम गरिने आयोनले जनाएको छ। युवाका क्षेत्रमा क्रियाशील पाँच दर्जन बढी संस्थाहरुको छाता सङ्गठन आयोन हो।