विप्लवका केन्द्रीय सदस्यसहित ३ जना पक्राउ

काठमाडौं- नेत्र विक्रम चन्द विप्लव नेतृत्वको नेकपाका केन्द्रीय सदस्यसहित ३ जना पक्राउ परेका छन् । 

पक्राउ पर्नेमा केन्द्रीय सदस्य श्यामबहादुर बोहरा, अनेरास्ववियू क्रान्तिकारीका जिल्ला सम्मेलन आयोजक समिति सह–संयोजक प्रेम प्रशान्त बोहरा र अनेरास्वबियू क्रान्तिकारी रुकुम पूर्वका जिल्ला सम्मेलन आयोजक समिति संयोजक हरि पुन रहेका छन् ।

उनीहरुलाई त्रिवेणी गाउँपालिका २ का बोहरालाई मंगलबार राति १० बजे त्रिवेणी गाउँपालिका ६ मुरुबाट प्रहरीले पक्राउ गरेको हो ।

केही दिनदेखि रोल्पा, सल्यान र रुकुम पश्चिमको सिमा नाका तथा रुकुम पश्चिमको त्रिवेणी गाउँपालिकाको विभिन्न ठाउँहरुमा समुहले चन्दा तथा फिरौती माग गरिरहेको र सुरक्षा चुनौती बढ्दै गएपछि उनीहरु माथि निगरानी बढाएको प्रहरीले जनाएको छ । 

त्यसै क्रममा मुरुमा विप्लव समुहका नेता तथा कार्यकर्ता जम्मा भएर शंकास्पद गतिविधि संचालन गरिरहेको अवस्थामा फेला परेपछि पक्राउ गरिएको  कर्णाली प्रदेशका प्रहरी प्रमुख डीआईजी पूर्णचन्द्र जोशीले जानकारी दिए ।