म्यागसेसे पुरस्कार पत्रकार रवीश कुमारसहित पाँच जनालाई

यस वर्षको रेमन म्यागसेसे पुरस्कार भारतीय पत्रकार रवीश कुमारसहित पाँच जनालाई प्रदान गरिने भएको छ । 

रेमन म्यागसेसे पुरस्कार संस्थाले जनाए अनुसार सन् २०१९ को पुरस्कार रवीश कुमारसहित म्यान्मारका को स्वे विन, थाइल्याण्डका अंगखाना नीलापजीत, फिलिपिन्सका रेमुन्डो पुजान्ते कैयाब र दक्षिण कोरियाका किम जोंगलाई प्रदान गरिने भएको छ । 

फिलिपिन्सका भूतपूर्व राष्ट्रपति रेमन म्यागसेसेको नाममा स्थापित यो पुरस्कार आफ्नो क्षेत्रमा विशेष योगदान दिएका एशियाका व्यक्ति तथा संस्थालाई प्रदान गरिन्छ ।
 
एशियाको प्रतिष्ठित यो पुरस्कार प्राप्त गर्ने एकमात्र नेपाली पत्रकार भारतदत्त कोइराला हुन् । नेपाली पत्रकारिताको विकासमा उल्लेख्य योगदान गरेवापत उनलाई सन् २००२ को रेमन म्याग्सेसे पुरस्कार प्रदान गरिएको थियो ।

कोइरालासँगै अन्य क्षेत्रका पाँच नेपालीले यो पुरस्कार प्राप्त गरेका छन् । म्यागसेसे पाउने नेपालीहरुमा महेशचन्द्र रेग्मी (सन् १९७७), भरत दत्त कोइराला (सन् २००२),  डा. सन्दुक रुइत (सन् २००६), महावीर पुन (सन् २००७) र शक्ति समूह (सन् २०१३) छन् ।
 
यसवर्षको रेमन म्यागसेसे पुरस्कार प्राप्त गर्ने भारतीय पत्रकार रवीश कुमार एनडीटीभी इन्डियाका म्यानेजिङ एडिटर हुन् ।
 
पुरस्कार संस्थाले ट्वीट मार्फत रवीश कुमारलाई यो सम्मान ‘आवाजविहिनहरुको आवाज बनेका काराण’ प्रदान गर्ने निर्णय गरेको उल्लेख गरेको छ ।
 
समाचार कार्यक्रम ‘प्राइम टाइम’ मार्फत आम मानिसहरुको वास्तविक जीवनसँग जोडिएका समस्या उठाउने गरेका रवीश कुमार सत्ताका विरुद्ध निडर भएर पत्रकारिता गर्ने चर्चित पत्रकार हुन् । 

पुरस्कार संस्थाले रवीशकुमारले नैतिक पत्रकारिताको उच्चतम अभ्यास गरेको, सत्य, अखंडता र स्वतन्त्रताका पक्षमा उनको साहस उच्चकोटीको रहेको साथै लोकतन्त्रप्रति उनको आस्था अविचलित रहेको भन्दै प्रशंशा गरेको छ ।