ब्राजिलको जेलमा कैदीहरुबीच झडप : ५२ जनाको मृत्यु 

ब्राजिलको पारा राज्यको एक जेलमा कैदी बन्दीबीच झडप हुँदा कम्तिमा ५२ जनाको मृत्यु भएको छ ।

जेलको एउटा ब्लकका कैदीको समूहले अर्को ब्लकका कैदीको समूहलाई आक्रमण गरेपछि झडप भएको हो। 

झडपमा १६ जनाको शीर छेदन गरिएको अन्तर्राष्ट्रिय सञ्चार माध्यमहरुले जनाएका छन् । जेलमा करिब पाँच घण्टासम्म झडप भएको थियो ।

जेलमा रहेका जेलरहरुलाई नियन्त्रणमा लिएर उनीहरुबीच आपसमा आक्रमण भएको थियो। बिबीसीका अनुसार अनुसार सुरुमा १६ जनाको टाउको काटिएको थियो। त्यसपछि जेलमा आगो लगाइएको थियो, आगलागीले निसास्सिएर बाँकीको मृत्यु भएको थियो।

ब्राजिलका टेलिभिजनहरुले जेलको भवनबाट धुँवा निस्किरहेको र केही कैदीहरु जेलको छतमाथि हिँडडुल गरिरहेको दृष्य प्रसारण गरेका छन् ।

ब्राजिलका सञ्चारमाध्यमहरुका अनुसार अल्टामिरा जेलको क्षमता २ सय रहे पनि ३ सय ११ जना कैदीलाई राखिएको थियो ।

ब्राजिलमा जेलभित्र बेला यस्ता झडप हुँदै आएको छ। गत मे महिनामा पनि विभिन्न चार जेलमा झडप हुँदा ४० जनाको मृत्यु भएको थियो । सन् २०१७ को जनवरीमा १३० जना कैदी मारिएका थिए।