कक्षा १२ को नतिजा प्रकाशित, यसरी हेर्नुहोस्

काठमाडौं- राष्ट्रिय परीक्षा बोर्डले गएको बैशाखमा सञ्चालन भएको कक्षा १२ को परीक्षाको नतिजा प्रकाशन गरेको छ ।  

बोर्डका अनुसार यसपटक १२ कक्षाको परीक्षामा सबैभन्दा माथिल्लो स्तरको जीपीए (३.६१ देखि ४.०० जीपीए) प्राप्त गर्ने विद्यार्थी संख्या  ३ हजार ६७ छ ।  त्यस्तै ३.२१ देखि ३.६० जीपीए प्राप्त गर्ने विद्यार्थी १६ हजार २०४ जना छन् । 

परीक्षा नियन्त्रक कृष्ण शर्माका अनुसार परीक्षामा सहभागी नियमित तर्फका २ लाख ९२ हजार १५३ परीक्षार्थीमध्ये ३ हजार ६७ जनाले मात्र उच्च तहको जीपीए प्राप्त गरेका हुन् । 

बोर्डका अनुसार ३१ हजार विद्यार्थीले २.८१ देखि ३.२० जीपीए प्राप्त गरेका छन् भने २.४१ देखि २.८० जीपीए ल्याउने विद्यार्थीको संख्या ५६ हजार ५०३ छ । २.०१ देखि २.४० जीपीए ल्याउने विद्यार्थीको संख्या भने ८६ हजार २२७ छ । १.६१ देखि २.०० जीपीए ल्याउने विद्यार्थी ६२ हजार ६१९ जना छन् ।

त्यस्तै १.२१ देखि १.१६० प्राप्त गर्ने विद्यार्थीको संख्या १९ हजार छ भने ०.८१ देखि १.२० ल्याउने विद्यार्थी ३ हजार ५२४ जना छन् । सबैभन्दा कम स्तरको ०.०० देखि ०.८० ल्याउने विद्यार्थीको संख्या भने १३ हजार ३६२ छ । 

परीक्षामा नियमित, ग्रेडवृद्धि र आंशिकतर्फ गरी कुल ४ लाख २८ हजार ६७ विद्यार्थी सहभागी थिए । बोर्डले गतवर्षदेखि कक्षा १२ को नतिजा ग्रेडिङ पद्धतिअनुसार प्रकाशित गर्न थालेको हो । 


यसरी हेर्न सकिन्छ नतिजा 
 
कक्षा १२ को नतिजा वेबसाइट, एसएमएस र आईभीआरबाट थाहा पाउन सकिने राष्ट्रिय परीक्षा बोर्डले जनाएको छ । 

नतिजा सार्वजनिक भैसकेपछि  राष्ट्रिय परीक्षा बोर्डको www.neb.gov.np र नेपाल टेलिकमको www.hseb.ntc.net.np वेबसाइटबाट हेर्न सकिने छ ।

यस्तै नेपाल टेलिकमको मोबाइलमा १६०१ मा एसएमएस पठाएर पनि नतिजा प्राप्त गर्न सकिन्छ । नेपाल टेलिकमको आईभीआर सेवाअन्तर्गत १६०१ नम्बर डायल गरेर प्राप्त निर्देशनअनुसार पनि नतिजा थाहा पाउन सकिने राष्ट्रिय परीक्षा बोर्डले जनाएको छ ।