सरकारपछि पूर्व राजाको दाबी : ‘रअ’ का प्रमुखलाई भेटेको छैन

काठमाडौं - सरकारका प्रवक्ता तथा सञ्चारमन्त्री गोकुलप्रसाद बास्कोटाले बिहीबार पत्रकार सम्मेलनमा प्रधानमन्त्री केपी शर्मा ओलीले रअका प्रमुखलाई नभेटेको दाबी गरे। उनले मिडियाले यो विषयलाई अतिरञ्जित गराएको तर प्रधानमन्त्री र रअका प्रमुख बीच भेट नै नभएको दाबी गरे। उनले प्रमाण ल्याउन समेत चुनौति दिए। 

सञ्चारमन्त्रीको भनाइपछि पूर्व राजा ज्ञानेन्द्र शाहले समेत आफूले रअका प्रमुखलाई नभेटेको दाबी गरे। पूर्व राजा शाहका सचिव डा फणिराज पाठकले एक विज्ञप्ति निकाल्दै यस्तो दाबी गरेका हुन्।

पाठकले जारी गरेको विज्ञप्तिमा भनिएको छ, ‘श्री ५ महाराजाधिराज ज्ञानेन्द्र वीर विक्रम शाहदेवबाट मध्यरातमा भारतीय गुप्तचर संस्था ‘रअ’का प्रमुखलाई भेटेको भन्ने केही अनलाईन पत्रिकाहरूमा छापिएका खबर पूर्णतया झूठो भएको जानकारी गराउन चाहन्छु। यस्ता कपोलकल्पित, मनगढन्ते र राष्ट्रको गरिमा घटाउने समाचारहरूले नेपाल र नेपालीको गर्व र सम्मानमा ठेस लाग्ने भएकोले यस्ता समाचार सम्प्रेषण गरेर पत्रकारिताको धर्म र समाजप्रतिको दायित्व नबिर्सन अनुरोध गर्दछु।’