डोटीमा वडा कार्यालयमा आगजनी : विप्लवमाथि आशंका

धनगढी- डोटीको जोरायल गाउँपालिका–४ लक्ष्मीनगर वडा कार्यालयमा आगजनी भएको छ । सोमबार राति भएको आगजनीबाट वडा कार्यालयका सम्पुर्ण सामान जलेर नष्ट भएका छन् । 

वडा अध्यक्ष र सचिव बस्ने दुबै कोठामा रहेका कागजात, कुर्सी टेवल सोफालगायतका सबै सामाग्री जलेर नष्ट भएको गाउँपालिका उपाध्यक्ष जमुना बोहोराले जानकारी दिईन । आगलागी कसले गर्यो भन्ने खुलेको छैन । विप्पव समुहले गरेको हुन सक्ने प्रहरीको आशंका छ । 

इलाका प्रहरी कार्यालय जोरायलका प्रमुख प्रहरी नायव उपरीक्षक महेन्द्र थापाले कार्यालयमा एक सेट सादा मोवाईल फोन भेटिएको जानकारी दिए । यस्तै कार्यालय नजिक दलालहरु होसियार, भ्रष्टाचारी खबरदार लेखेको पर्चा पनि भेटिएको थापाले जानकारी दिए । 

केही समय पहिले विप्लव समुहले सोही गाउँपालिकाको वडा नम्वर ६ को कार्यालयमा पनि तालाबन्दि गरेको थियो । पछिल्लो समय विप्लव समुहले जनप्रतिनिधिहरुसंग चन्दा माग्ने र नदिएपछि कार्यालय जलाउने गरेको आरोप लाग्ने गरेको छ ।