भोलिदेखि तीन दिन भारी वर्षा हुने, सतर्क रहन अपिल

काठमाडौं- पर्दै–रोकिँदै गरेको मनसुनी वर्षा सोमबार (भोलि)बाट पुनः सक्रिय हुने भएको छ । मनसुन सक्रिय भएसंगै भोलि साँझबाट भारी वर्षा हुने मौसम पूर्वानुमान महाशाखाले जनाएको छ ।  

मनसुनको न्यूनचापीय रेखा नेपालको दक्षिणमा रहे पनि बङ्गालको खाडीबाट नेपाल प्रवेश गरेको जलवाष्पयुक्त हावा र स्थानीय वायुको असरले मध्य क्षेत्र र पूर्वी तराई क्षेत्रमा भारी वर्षा हुने मौसमविद् बरुण पौडेलले जानकारी दिए । उनका अनुसार सोमबार, मंगलबार र बुधबार मनसुन अति सक्रिय हुने र त्यसले भारी वर्षा गराउने छ । 

विशेषगरी काठमाडौँ क्षेत्रमा अबको केही दिन भारी वर्षा हुने जनाइएको छ । केही दिनयता राजधानीमा राति र दिनमै पनि भारी वर्षा हुने गरेको छ । निकै आकाश खुले पनि छिनमै बादल लागेर भारी वर्षा भइरहँदा राजधानीका ठूला तथा साना नदीमा बाढी आउन सक्ने मौसमविद्हरुले जनाएका छन् ।

वर्षासँगै बाढी पहिरो र डुबानको जोखिम बढ्ने भएकाले सतर्कता अपनाउन पनि उनीहरुले अपिल गरेका छन् । गत हप्ता परेको वर्षासँगै पूर्वी तराई र काठमाडौं उपत्यकाका धेरै ठाउँ डुवानमा परेको थियो । जसमा परेर ९० भन्दा धेरैको मृत्यु भएको छ भने ३५ भन्दा धेरै वेपत्ता भएका छन् । 

आगामी तीन दिनको मौसम पूर्वानुमान

श्रावण ५ गते (आइतवार)

दिउँसो: देशभर आंशिक देखि सामान्य वदली रहि केहि स्थानहरुमा वर्षा हुने सम्भावना छ। 

राती: देशको पुर्वी भु-भागमा सामान्य देखि पुर्ण बदली साथै मध्य र पश्चिमी भु-भागमा आंसिक देखि सामान्य वदली रही देशका केहि स्थानहरूमा वर्षा हुने सम्भावना छ। पुर्व र मध्यका एक दुई स्थानहरुमा भारि वर्षा हुने सम्भावना छ ।

श्रावण ६ गते (सोमबार)

दिउँसो: देशको पुर्वी र मध्य भु-भागमा सामान्य देखि पुर्ण बदली साथै पश्चिमी भु-भागमा आंसिक देखि सामान्य वदली रहि पुर्वका अधिकांश स्थानमा साथै मध्य तथा पश्चिमका केहि स्थानहरुमा वर्षा हुनेछ। पुर्व तथा मध्यका एक दुई स्थानहरुमा भारि वर्षा हुने सम्भावना छ ।

राती: देशको पुर्वी र मध्य भु-भागमा सामान्य देखि पुर्ण बदली साथै पश्चिमी भु-भागमा आंसिक देखि सामान्य वदली रही देशको पुर्वी तथा मध्यका अधिकांश स्थानहरुमा साथै पश्चिमका केहि स्थानहरूमा वर्षा हुनेछ । देशको पुर्व र मध्यका थोरै स्थानमा साथै पश्चिमका एक दुई स्थानहरुमा  भारि वर्षा हुने सम्भावना छ ।

श्रावण ७ गते (मंगलबार)

दिउँसो: देशको पुर्वी र मध्य पुर्ण बदली साथै पश्चिमी भु-भागमा सामान्य वदली रहि पुर्व र मध्यका अधिकांश स्थानमा साथै पश्चिमका केहि स्थानहरुमा वर्षा हुनेछ। देशको पुर्व र मध्यका थोरै स्थानमा साथै पश्चिमका एक दुई स्थानहरुमा  भारि वर्षा हुने सम्भावना छ । पुर्व र मध्यका एक दुई स्थानमा अति भारी वर्षाको सम्भावना छ।

राती: देशको पुर्वी र मध्य पुर्ण बदली साथै पश्चिमी भु-भागमा सामान्य वदली रहि पुर्व र मध्यका अधिकांश स्थानमा साथै पश्चिमका केहि स्थानहरुमा वर्षा हुनेछ। देशको पुर्व र मध्यका थोरै स्थानमा साथै पश्चिमका एक दुई स्थानहरुमा  भारि वर्षा हुने सम्भावना छ । पुर्व र मध्यका एक दुई स्थानमा अति भारी वर्षाको सम्भावना छ।

आगामी २४ घण्टाका लागि चेतावनी तथा परामर्श 

देशका एक दुई स्थानहरुमा  भारी वर्षाको सम्भावना छ जसका कारणले ती क्षेत्रका पहाडी भू-भागमा पहिरो जान सक्ने भएकोले सामान्य सतर्कता अपनाउन अनुरोध गरिन्छ। पहाड तथा चुरेबाट बहने खोलाहरुमा जल सहत हल्का बढ्न सक्ने देखिन्छ।