आजका अखबार : सद्दे गाडी थन्क्याउँदै, नयाँ किन्दै

काठमाडौं- राजधानीबाट प्रकाशित बुधबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

आजको नागरिक दैनिकले मन्दिरको अर्बौको जग्गा बेच्ने महन्तलाई निलम्बन गरेर छानबिन थालिएको विषयलाई मुख्य समाचार बनाएको छ ।

महोत्तरीको लक्ष्मीनारायण मठ मटिहानीका मानमहन्त जगन्नाथ दास वैष्णवलाई गुठी संस्थानले निलम्वन गरेर छानविन सुरु गरेको समाचारमा उल्लेख छ ।

महन्तले धनुषामा ५ विघा र रुपन्देहीमा २ विघा जमिन विभिन्न मितिमा विक्रि गरेको भेटिएको थियो । जसको अहिले चलन चल्तीको मूल्य धनुषाको जग्गाको ३ अर्ब र रुपन्देहीको २३ करोड रहेको जनाइएको छ ।

यस्तै नागरिकले संसदीय समितिका सभापतिहरुलाई सद्दे गाडी थन्क्याएर नयाँ गाडी दिने तयारी भएको विषयलाई पनि प्राथमिकताका साथ छापेको छ ।

पहिलो लटमा चार समितिका सभापतिलाई गाडी उपलब्ध गराई सकिएको छ । दोस्रो लटमा ११ जना सभापतिलाई गाडी उपलब्ध गराउने तयारी भएको समाचारमा उल्लेख छ ।

समितिका सभापतिहरु अहिले चढेको गाडी फ्रेस र सद्दे अवस्था छ । तर, यी गाडीलाई ग्यारेजमा थन्क्याएर सभापतिहरुको मागबमोजिम नयाँ गाडी दिन लागिएको हो । संसद् सचिवालयले ६ करोड १६ लाख खर्चिएर हालसालै ११ वटा स्कोर्पियो किनेको थियो ।
 
आजको कान्तिपुरले भने सरकारले असार महिनामै साढे २ खर्ब खर्च गरेको विषयलाई मुख्य समाचार बनाएको छ ।

असारे विकाससँगै सरकारले आर्थिक वर्षको अन्त्यमा बजेटको २४ प्रतिशत अर्थात २ खर्ब ५६ अर्ब ४० करोड ५३ लाख रुपैयाँ सकिएको हो । 

विकासतर्फको कूल पुँजीगत खर्चमध्ये ३५ प्रतिशत असारमै सकिएको महालेखा नियन्त्रकको कार्यालयले जनाएको छ । संसदीय समितिले असारमा १० प्रतिशत भन्दा बढि खर्च नगर्न दिएको निर्देशन लत्याउदै असारे भेलले बगाउने गरि गरिएको विकासका कारण यति धेरै रकम स्वाहा भएको समाचारमा उल्लेख छ ।

यस्तै कान्तिपुरले खुम्चिदैँ खाडीको श्रम बजार शीर्षकको खबरलाई पनि प्राथमिकताका साथ छापेको छ । उसका अनुसार अघिल्लो वर्ष भन्दा यो वर्ष खाडी जाने नयाँ कामदार ३३ प्रतिशत, पुनः श्रमस्विकृतिबाट जाने ५.४१ र समग्रमा १६.९५ प्रतिशले कमि आएको छ ।
 
आजको अन्नपूर्ण पोस्ट्ले भने मान्छे बेच्ने गिरोहका विषयमा विशेष स्टोरी गरेको छ भने नेकपाको भागबन्डा मिलेको विषयलाई प्राथमिकताका साथ छापेको छ ।