फाइनल पुग्न भारतलाई सामान्य लक्ष्य

एजेन्सी- इंग्ल्यान्डमा जारी आइसिसी एकदिवसीय विश्वकप क्रिकेट अन्तरगत भारतलाई फाइनल प्रवेशका लागि न्युजिल्यान्डले २ सय ४० रनको सामान्य लक्ष्य सुम्पेको छ । टस जितेर पहिले ब्याटिङ गर्ने निर्णय गरेको न्युजिल्यान्डले निर्धारित ५० ओभरमा ८ विकेट गुमाउँदै २ सय ३९ रन जोड्यो ।

मंगलबार सुरु भएको खेल वर्षले प्रभावित भएपछि खृल पुनः बुधबार सुरु भएको हो । मंगलबार साँझ खेल न्युजिल्यान्डले ४६.१ ओभरमा ५ विकेट गुमाएर २११ रन जोड्दा भारी वर्षा भएपछि खेल रोकिएको थियो । विश्वकपमा बुधबार रिजर्भ डे भएकाले खेल रोकिएको ओभरबाट नै सुरु भएको हो । 

चौथो ओभरको तेस्रो बलमा टोलीको १ रन हुँदा पहिलो विकेटको रुपमा मार्टिन गुप्टिललाई गुमाएको न्युजिल्यान्डले १९ औं ओभरमा ६९ रन पुग्दा हेन्री निकोलसलाई गुमाएको थियो । 

खराव अवस्थाबाट गुज्रिएको न्युजिल्यान्डलाई कप्तान केन विलियमसनले सम्हालेका थिए । उनले निकोलससँग ६८ रनको साझेदारी गर्दा रोज टेयलरसँग ६५ रनको साझेदारी गरेका थिए । केनले ९५ बलमा ६ चौका प्रहार गर्दै ६७ रनको अर्धशतकीय पारी खेले । 

त्यस्तै टेयलरले ९० बलमा ३ चौका र १ छक्का प्रहार गर्दै ७४ रन जोडेका हुन् । यसअघि पहिलो विकेटको रुपमा १ रनको गुप्टिल आउट हुँदा २८ रनामा निकोलस पेभिलियन फर्किएका थिए । जेम्स नीशामले १२, कोलिन डे ग्रान्डोमेले १६, टोम लाथमले १० रन जोडे । 

त्यस्तै मिचेल सान्टर ९ र बोल्ट ३ रनमा अविजित रहे । भारतका लागि भुवनेश्वर कुमारले तीन तथा जसप्रित बुम्राह, युजेन्द्र चाहल, हार्दीक पाण्डेय र रबिन्द्र जडेजाले एक एक विकेट लिए ।