प्रहरी पुगेपछि मलामीको भागाभाग

जनकपुरधाम – धनुषामा एक युवतीको शव जलाइरहेको स्थानमा प्रहरी पुगेपछि मलामीहरुको भागाभाग भएको छ। धनुषाको सवैला नगरपालिका–१ की १४ वर्षीया पिंकीकुमारी यादवको शव जलाइरहेको अवस्थामा अचानक प्रहरी पुगेपछि मलामीहरुको भागाभाग भएको हो।

आफ्नै घरमा भुन्डिएको अवस्थामा फेला परेको पिंकीको शव अबेर राती जलाइरहेको बेला प्रहरी पुगेको थियो। झुन्डिएको अवस्थामा शव फेला परेपनि परिवारका सदस्यले प्रहरीलाई खबर गरेका थिएनन्। पछि प्रहरीले सूचना पाएपछि शव जलाउन रोकेको थियो। घटना शंकास्पद रहेको भन्दै प्रहरीले आधा जलिसकेको शव निकालेर अनुसन्धान सुरु गरेको छ।

धनुषाका एसपी शेखर खनालले मृतक पिंकीका बुबा शत्रुध्न यादव, उनकी आमासहित सात जनालाई नियन्त्रणमा लिएर अनुसन्धान सुरु भएको जानकारी दिएका छन्। 

खनालले शव जलाइरहेको स्थानमा राती १२ बजे प्रहरी पुगेपछि पिंकीका बुबासहित अन्य मलामीहरु तत्काल भागेपनि प्रहरी पक्राउ गर्न सफल भएको बताए। ‘आधा जलेको शव पोस्टमार्टमको लागि जनकपुर अञ्चल अस्पतालमा पठाएका छौं,’ खनालले भने, ‘अनुसन्धान हुँदै छ, थप कुरा चाँडै बाहिर आउँछ।’