विप्लव समुहले वडा कार्यालयमा आगो लगायो, इन्स्पेक्टर घाइते

बर्दिया- नेत्र विक्रम चन्द विप्लव समूहले बर्दियाको गेरुवा गाउँपालिका–६ को वडा कार्यालयमा आगजनी गरेको छ । सोमबार मध्यरातमा विप्लव समूहले वडा कार्यालयमा आगजनी गरेको प्रहरीले जनाएको छ । 

आगजनीबाट वडा कार्यालयको लेखाफाट जलेर पुरै नष्ट भएको छ भने अन्य दुई कोठामा पनि क्षति पुगेको छ । आगो निभाउने क्रममा इलाका प्रहरी कार्यालय पाताभार प्रहरी निरिक्षक खेमबहादुर मल्ल गम्भीर घाइते भएका छन् । 

आगो निभाउने क्रममा छत ढलेर लाग्दा उनी गम्भीर घाइते भएका हुन् । उनलाई थप उपचारका लागि नेपालगन्ज पठाइएको प्रहरीले जनाएको छ । 

घटनास्थलमा विप्लव समुहको  भेरी कर्णाली ब्युरोको पर्चा भेटिएको छ । घटना विप्लव समुहले नै गरेको आशंकामा प्रहरीले सर्च अभियान तिब्र पारेको छ । घटनामा संलग्नहरुको खोजी भइरहेको प्रहरीले जनाएको छ ।