चार देशका लागि सिफारिस राजदूत अनुमोदित

काठमाडौं - विभिन्न चार देशका लागि सिफारिस भएका राजदूत अनुमोदित भएका छन्। सोमबार बसेको संसदको विशेष सुनुवाइ समितिले सबै राजदूतको नाम अनुमोदन गरेको हो।

समिति बैठकमा पहिला बंगलादेशका लागि प्रस्तावित राजदूत  डा. बंशीधर मिश्रको सुनुवाई भएको थियो । त्यसपछि स्थगित भएर पुन: ३ बजे बसेको बैठकमा अन्य प्रस्तावित राजदूतहरुको सुनुवाई भएको थियो ।

समितिबाट अनुमोदित भएसँगै बंगलादेशका लागि डा. बंशीधर मिश्र, अस्ट्रेलियका लागि महेशराज दाहाल, स्पेनका लागि दावाफुटी शेर्पा र कतारका लागि नारदनाथ भारद्वाज राजूदत हुने भएका छन्।

बैठकमा बंगलादेशका लागि प्रस्तावित राजदुत मिश्रले आफूले बंगलादेशको कनेक्टिभीटीलाई जोड दिएर अघि बढ्ने प्रतिवद्धता व्यक्त गरेका थिए। नेपाललाई समृद्ध बनाउने गरी लगानी भित्र्याउन, पर्यटन प्रवर्द्धन गर्न भारतसँग कुरा गरेर बंगलादेशसँग सोझै सम्बन्ध कायम गर्न कूटनीतिक पहल गर्ने उनको योजना छ।

गत जेठ २३ गते सरकारले बंगलादेश, कतार, अष्ट्रेलिया र स्पेनका लागि राजदुत सिफारिस गरेको थियो। समितिले अनुमोदन गरेपछि प्रस्तावित राजदुतहरुलाई राष्ट्रपतिले नियुक्त गर्ने संवैधानिक व्यवस्था छ।