पहिलो दिनको खेलमा इन्डिया ७८ रनमै अलआउट, इंग्ल्यान्डको बिस्फोटक ब्याटिङ

काठमाडौं– पहिलो खेल ड्र भएर दोस्रो खेल इन्डियाले जितेको इन्डिया–इंग्ल्यान्ड टेस्ट सिरिजको तेस्रो खेलमा इंग्ल्यान्डले सानदार सुरुआत गरेको छ।

लिड्स रंगशालामा जारी खेलमा टस जितेर ब्याटिङ रोजेको इन्डियाले पहिलो इनिङमा घरेलु बलरसामू कमजोर सावित हुँदै ४० ओभर चार बलममा ७८ रन बनाएर अलआउट भयो।

इंग्ल्यान्डका जेम्स एन्डरसन र केइरग ओभरटोनले समान ३–३ विकेट गिराए भने ओलीए रोबिन्सन र साम कुरनले समान २–२ विकेट लिए।

इंग्ल्यान्डका कसिला बलरमाझ इन्डियाका के एल राहुल, मोहम्मद शामी र जसप्रिमत बुमरा शून्य रनमै आउट भए।

त्यसबाहेक चेतेश्वर पुजरा, रिषभ पन्त, मोहम्मद सिरज र रविन्द्र जाडेजाले क्रमश १, २, ३ र ४ रन बनाए। अन्य खेलाडीले पनि सम्झालायक प्रदर्शन गरेनन्।

पहिलो दिनमै ब्याटिङ थालेको इंग्ल्यान्डले विना विकेट क्षतिमा १२० रन बनाएको छ। ओपनिङमा आएका रोरी बर्नसले ५२ र हसिब हमिदले ६० रन बनाएका छन्।

अहिले इन्डिया ४२ रनले अघि छ। दोस्रो दिनको खेल आज(बिहीबार) पौने तीन बजेबाट सुरु हुनेछ।