बंगलादेशलाई पराजति गर्दै भारत सेमिफाइनलमा

एजेन्सी-आइसिसी एकदिवसीय विश्वकप क्रिकेट अन्तरगत बंगलादेशलाई पराजति गर्दै भारत प्रतियोगिताको सेमिफाइनलमा प्रवेश गरेको छ । मंगलबार भएको खेलमा भारतले बंगलादेशलाई २८ रनले पराजित गरेको हो । पराजसत भएसँगै बंगलादेश प्रतियोगिताबाट बाहिरिएको छ ।

भारतले दिएको ३ सय १५ रनको लक्ष्य पछ्याएको बंगलादेशले ४८ ओभरमा सबै विकेट गुमाउँदै २ सय ८६ रन मात्र बनाउन सक्यो । बंगलादेशका लागि शकिब अल हसन र मोहमद साइफुदिनले अर्धशतकीय पारी खेले पनि टोलीको जितका लागि प्रयाप्त भएन् । शाकिबले ७४ बलमा ६ चौका प्रहार गर्दै ६६ रन जोडेका हुन् । मोहमद साइफुदिनले ३८ बलमा ९ चौका प्रहार गर्दै अविजित ५१ रन जोडे । 

यस्तै बंगलादेशका सब्बीर रहमानले ३६, सौम्य सरकारले ३३ तथा मुस्फिकर रहिमले २४ रन बनाए । भारतका जस्प्रित बुम्राहले ४ तथा हार्दिक पाण्डयाले ३ विकेट लिए ।

यसअघि टस जितेर पहिले ब्याटिङ गरेको भारतले निर्धारित ५० ओभरमा ९ विकेट गुमाउँदै ३ सय १४ रन बनाएको थियो । भारतका रोहित शर्माले शतकीय पारी खेले । उनले ९२ बल खेल्दै ५ छक्का र ७ चौकाको मद्दतले सर्वाधिक १०४ रन बनाए । 

यससँगै रोहित कम खेलमा सर्वाधिक चाँडो ५ शतक बनाउने खेलाडी बने । उनले विश्वकपको १५ इनिङ्समा ५ शतक बनाएका हुन् । यस्तै ओपनर लोकेस राहुलले ७७ रनको अर्धशतकीय पारी खेल्दा ऋषभ पन्तले ४८, महेन्द्र सिंह धोनीले ३५ तथा कप्तान बिराट कोहलीले २६ रनको योगदान गरे ।

बंगलादेशका मुस्ताफिजुर रहमानले ५ विकेट हात पारे । यस्तै शकिब अल हसन, रुबेल हुसेन र सौम्या सरकारले समान १र१ विकेट हात पारे ।