नेपाली यु-१९ क्रिकेट टोली मलेशिया प्रस्थान

काठमाडौं- मलेशियामा आयोजना हुने एसिसी यू-१९ इस्टर्न रिजन क्रिकेट प्रतियोगितामा सहभागी हुन १४ सदस्यीय नेपाली युवा टोली आइतबार त्यसतर्फ प्रस्थान गरेको छ । 

असार १७ गतेदेखि सुरु हुने प्रतियोगिताका लागि रोहितकुमार पौडेलको नेतृत्वमा रित गौतम, पवन सर्राफ, विशाल विक्रम केसी, भीम सार्की, कुशल मल्ल, रशिद खान, सागर ढकाल, हरिबहादुर चौहान, प्रतिष जिसी, कमलसिंह ऐरी, खडक बोहरा, तिलक भण्डारी र लोकेश बम छन् । त्यस्तै टोलीको प्रशिक्षकमा विनोद दास छन् भने व्यवस्थापकमा राजु खड्का र फिजियोमा विक्रम न्यौपाने छन् । 

प्रतियोगिताको समूह ‘ए’ मा रहेको नेपालले आफ्नो पहिलो खेल यही असार १८ गते चीनसँग खेल्नेछ । नेपालको समूहमा चीन र सिङ्गापुर छन् । त्यसैगरी नेपालले आफ्नो दोस्रो तथा समूह चरणको अन्तिम खेल असार २० गते सिङ्गापुरसँग खेल्नेछ । 

समूह ए रहेको म्यान्मारले नाम फिर्ता लिएपछि उक्त समूहमा तीन टोली मात्रै सहभागी भएका हुन् । समूह ‘बी’मा आयोजक मलेशियासँगै, भूटान, हङ्कङ र थाइल्याण्ड गरी चार टिम रहेका छन् । प्रतियोगिता असार २५ गतेसम्म चल्नेछ ।