दक्षिण अफ्रीका विजयी, श्रीलंका पराजित

एजेन्सी- आइसिसी एकदिवसीय विश्वकप क्रिकेटमा दक्षिण अफ्रीकाले श्रीलंकामाथी सानदार जित निकालेको छ । शुक्रबार भएको खेलमा दक्षिण अफ्रीकाले श्रीलंकालाई ९ विकेटले पराजित गर्दै सानदार जित निकालेको हो । 

श्रीलंकाले दिएको २०४ रनको सामान्य लक्ष्य पछएको दक्षिण अफ्रीकाले ३७.२ ओभरमा मात्र एक विकेट गुमाएर पुरा गर्यो । दक्षिण अप्रीकाको जितका लागि कप्तान फाप डु प्लेसिस र हसिम अमलाले अविजित १७५ रनको साझेदारी गरे । 

डु प्लेसिसले १०३ बलमा १० चौका र १ छक्काको मद्दतमा अविजित ९६ रनको अर्धशतकीय पारी खेलेका हुन् । त्यस्तै अमलाले १०५ बलमा ५ चौका सहित ८० रनको अर्धशतकीय पारी खेले । पहिलो विकेटको रुपमा क्विनटन डी कक १५ रन बनाएर पेभिलिएन फर्किएका थिए । श्रीलंकाका लागि एक माात्र विकेट लासिथ मालिंगाले लिए। 

यसअघि टस हारेर पहिले ब्याटिङको निम्तो पाएको श्रीलंकाले ४९.३ ओभरमा सबै विकेट गुमाउँदै २ सय ३ रन जोडेको थियो । दक्षिण अफ्रीकाका बलर सामु श्रीलंकाका कुनै पनि ब्याट्सम्यानले जमेर खेल्न सकेनन् । पहिलो ओभरको पहिलो बलमा नै कप्तान दिनुथ करुनारत्नेलाई गुमाएको श्रलिंकाले १० औं ओभरमा ६७ रन पुग्दा अविशेक फर्नान्डोलाई गुमाएको थियो । 

३० रनमा खेली रहेका फर्नान्डो डाइने प्रेटोरियसको बलमा क्याचआउ हुँदै पेभिलिएन फर्किएका थिए । तेस्रो विकेटको रुपमा ३० रनमा खेली रहेका कुसल परेरालाई गुमाए पछि टोलीको १०० रन पुग्दा २२ औं ओभरमा एन्जोलो माथेवजलाई गुमाएको थियो । उनी ११ रनमा पेभिलिएन फर्किएका हुन् । 

त्यसपछि २३ रनमा कुसल मेन्डीज, २४ रनमा धनन्जय डि सिल्भा, १८ रनमा जीवन मेन्डीन, २१ रनमा थिसरा परेरा र १७ रनमा इसुरु उदना पेभिलियन फर्किएका थिए ।  दक्षिण अफ्रीकाका लागि क्रिस मोरिस, डाइने प्रेटोरियसले समान तीन तीन विकेट लिए । त्यस्तै  कागिसो रबाडाले दुई तथा एन्जल फेहलुक्वायो र डुमीनीले एक विकेट लिए ।