युरोपियन च्याम्पियनसिप र टोकियो ओलम्पिक खेल्न चाहन्छु : एमबाप्पे

एजेन्सी- युवा स्टार खेलाडी केलियन एमबाप्पे वर्ष २०२० मा व्यस्त रहने देखिएका छन् । २० वर्षीय फ्रान्स तथा पेरिस सेन्ट जर्मन (पिएसजी)का स्टार स्ट्राइकर एमबाप्पेले सन् २०२० मा हुने युरोपियन च्याम्पियनसिप र टोकियो ओलम्पिक खेल्ने चाहना व्यक्त गरेसँगै उनी व्यस्त हुने अनुमान गरिएको हो । 

फ्रान्सलाई रुस विश्वकप २०१८ को उपाधि दिलाउन एमबाप्पेले महत्वपूर्ण भुमिका खेलेका थिए । फ्रान्सको यू-२१ फुटबल टोली ओलम्पिकमा छनोट भएसँगै यसै साता युरोपियन यू-२१ च्याम्पयनसिपको सेमिफाइनलमा प्रवेश गरेको छ । 

यसै सफलतामा एमबाप्पेले खुसी हुँदै आफुले पनि यी दुबै प्रतियोगिता खेल्ने इच्छा रहेको ट्वीटरमार्फत बताएका छन् । उनले फ्रान्सको यू-२१ टोलीबाट कुनै प्रतियोगिता खेलेका छैनन् । तर, उनले ओलम्पिक र च्याम्पियनसिप खेल्ने इच्छा रहेको बताएका छन् । 

उनको भनाइलाई लिएर फ्रान्स फुटबल संघका अध्यक्ष नोएल ली ग्रेटले खुसी व्यक्त गरेका छन्। ‘एमबाप्पेले खुसीको कुरा गरेका छन् । उनले फ्रान्सको जुनियर टिमबाट खेल्ने इच्छा देखाएका छन् । खास गरी ओलम्पिकमा ।’ 

संघका अध्यक्ष ली ग्रेटले भने, ‘खुसीको विषय भएपनि एक पटक हामी उनलाई भेट्न चाहन्छौ । र प्रशिक्षक स्याल्भिन रिपोललाई सोध्ने छौ । तर, निर्णय उनको हातमा छ ।’