ब्राजिलियन गोलरक्षक नेटो बार्सिलोनामा अनुबन्ध

एजेन्सी- ब्राजिलियन गोलरक्षक नेटोलाई बार्सिलोनाले अनुबन्ध गरेको छ । उनलाई बार्सिलोनाले अर्को ला लिगा क्लब भ्यालेन्सियाबाट अनुबनध गरेको हो । २९ वर्षीय नेटोसँग बार्सिलोनाले चार वर्षको सम्झौता गरेको छ । सम्झौता अनुसार अब नेटो २०२-२३ को सिजनसम्म बार्सिलोनामा रहने छन् । नेटोलाई बार्सिलोनाले २३ मिलियन पाउण्डमा अनुबन्ध गरेको हो । 

२०१७-१८ को सिजनमा इटालियन क्लब युभेन्टसबाट भ्यालेन्सिया पुगेका नेटोले भ्यालेन्सियामा पहिलो गोलरक्षकको भुमिका निभाएका थिए । उनले यस सिजन भ्यालेन्सियाका लागि सबै खाले ४७ खेल खेलेका थिए । भ्यालेन्सियामा दुई सिजन बिताएका उनले क्लबका लागि ८० खेल खेलेका छन् । 

केही दिन अघिमात्र भ्यालेन्सियाले बार्सिलोनाका दोस्रो रोजाइका गोलरक्षक ज्यासपर सिलेसनलाई अनुबन्ध गरेको थियो । ३० वर्षीय गोलरक्षक सिलेसनका लागि भ्यालेन्सियाले बार्सिलोनालाई ३० मिलियन युरो तिरेको रिपोर्टमा जनाएको छ । 

उनले भर्खरै सकिएको सिजनमा बार्सिलोनाका लागि सबैखाले ११ खेल मात्रै खेलेका थिए । जसमा उनले कोपा डेल रे ७ खेल खेल्दा ला लिगामा ३ र युरोपियन च्याम्पियन्स लिगमा एक खेल खेले । बार्सिलोनामा तीन सिजन बिताउँदा सिलेसनले दुई ला लिगा दुई कोपा डेल रे, स्पेनिस सुपर कपलायत उपाधि जितेका थिए ।

बार्सिलोनाले सिलेसनलाई सन् २०१६ मा डच क्लब आयाक्सबाट भित्र्याएको थियो । तर, बार्सिलोनामा उनले ज्यादै कम मात्रै मैदानमा समय पाउँथे । जर्मन गोलरक्षक मार्क आन्द्रे टर स्टेगेन घाइते हुँदा मात्रै उनलाई मौका दिइन्थ्यो ।