फिन्चको शतकमा इंग्ल्यान्डलाई मध्यम लक्ष्य

एजेन्सी- कप्तान आरोन फिन्चको शतकीय पारीको मद्दतले अष्ट्रेलियाले आयोजक राष्ट्र इंग्ल्यान्डलाई जितका लागि २ सय ८६ रनको मध्यम लक्ष्य सुम्पको छ । टस हारेर पहिले ब्याटिङको निम्तो पाएको अष्ट्रेलियाले निर्धारित ५० ओभरमा ७ विकेट गुमाउँदै २ सय ८५ रन जोडेको हो । 

अष्ट्रेलियाका लागि कप्तान फिन्चले ११६ बलको सामना गर्दै ११ चौका र २ छक्का पहर गर्दै १०० रन जाडेका थिए । ओपनर फिन्चले पहिलो विकेटका लागि डेभिड वार्नरसँग मिल्दै १२३ रनको साझेदारी गरेका थिए । 

वार्नरले ६१ बलको सामना गर्दै ६ चौकाको मद्दतमा ५३ रनको अर्धशतकीय पारी खेले । त्यसपछि दोस्रो विकेटका रुपमा उस्मान ख्वाजा २३ रनमा पेभिलिएन फर्किए । तेस्रो विकेटको रुपमा कप्तान फिन्च आउट हुँदा अष्ट्रेलियाको स्कोर ३५.३ ओभरमा १८५ थियो । 

त्यसपछि ग्लेन म्याक्सवेल १२ रनमा आउट हुँदा पाँचौ विकेटको रुपमा मार्कुस स्टोनिस ८ रनमा रन आउट भए । छैटौ विकेटको रुपमा अष्ट्रेलियाको स्कोर २५० पुग्दा स्टेवन स्मिथ पेभिलिएन फर्किए । उनले ३४ बलमा ५ चौका प्रहार गर्दै ३८ रन जोडेका थिए । 

पात कुमिन्स १ रनमा आउट हुँदा एलेक्स क्यारी ३८ रनमा अविजित रहे । उनले २७ बलमा ५ चौका प्रहार गर्दै ३८ रनमा अविजित रहेका हुन् । त्यस्तै मिचेलल स्टार्क ४ रनमा अविजित रहे । इंग्ल्यान्डका लागि क्रिस वोकसले दुई तथा जोफार आर्चर, मार्क वुड, बेन स्टोक्स र मोइन अलीले एक एक विकेट लिए ।