भेनेजुएला कोपा अमेरिका फुटबलको क्वाटरफाइनलमा 

एजेन्सी-  भेनेजुएला कोपा अमेरिका फुटबलको क्वाटरफाइनलमा प्रवेश गरेको छ । शनिबार राति भएको समूह चरणको अन्तिम खेलमा बोलिभियालाई ३-१ गोलले पराजित गर्दै क्वाटरफाइनलमा पुगेको हो ।

भेनेजुएलाको जितका लागि डर्विन माचिसले दुई तथा जोसेफ मार्टिनेजले एक गोल गरे । बोलिभियाका लिओनेल जस्टिनियानोले एक गोल फर्काएका थिए । खेलको दुई नमनेटमा नै माचिसले गो गर्दै अग्रता दिलाएका थिए । माचिसको गोलबाट नै भेनेजुएलाले पहिलो हाफमा १-० को अग्रता लिएको थियो । 

त्यसपछि दोस्रो हाफमा थप दुई गोल गर्दा एक गोल खान पुगेको थियो । ५५ औं मिनेटमा माचिसले नै व्यक्तिगत दोस्रो गोल गर्दै अग्रता दोब्बर पारे । ८२ औं मिनेटमा बोलिभियाका लिओनेल जस्टिनियानोले एक गोल गर्दै खेलमा फर्किने प्रयास गरेका थिए । तर त्यसको चार मिनेट नबित्दै भेनेजुएलाका जोसेफले गोल गर्दै ३-१ को जित दिलाए ।

जितसँगै समूह 'ए' को भेनेजुएला समूह उपविजेता बन्दै क्वाटरफाइनलमा पुगेको हो । पराजित बोलिभिया प्रतियोगिताको समूह चरणबाटै बाहिरियो । यस समूहबाट ब्राजिल समूह विजेता बन्दै क्वाटरफाइनलमा पुगेको छ ।