चिलीको लगातार दोस्रो जित

एजेन्सी- कोपा अमेरिका फुटबल अन्तरगत साविकको विजेता चिलीले लगातार दोस्रो जित निकालेको छ । शनिबार बिहान भएको खेलमा इक्वेडरलाई २-१ गोलले पराजित गर्दै चिलीले लगातार दोस्रो जित निकालेको हो ।

चिलिको जितका लागि जोसे फियुनजालीडा र एलेक्सिस सान्चेजले एक एक गोल गरे । इक्वेडरका इन्नर भ्यालेन्सियाले एक गोल फर्काए । खेलको ८  औं मिनेटमा नै चिलीले अग्रता लिएको थियो । 

जोसे फियुनजालीडाले गोल गर्दै चिलीलाई अग्रता दिलाए । तर २६ औं मिनेटमा इक्वेडरका भ्यालेन्सियाले गोल गर्दै खेल १-१ को बराबरीमा ल्याए । पहिलो हाफ १-१ को बराबरी भएको खेलको दोस्रो हाफमा चिलीले थप एक गोल गर्यो । 

खेलको ५१ औं मिनेटमा सान्चेजले गोल गर्दै चिलीलाई २-१ को अग्रता दिलाए । त्यसपछि खेलको ८९ औं मिनेटमा इक्वेडरका गाब्रियल एचिलरले रातो कार्ड बाहिरिएको खेलमा थप गोल हुन नसक्दा खेल चिलीले २-१ ले जितेको हो ।  

जितसँगै समूह सी को चिलीले २ खेलबाट ६ अंक जोड्दै तालिकाको शीर्ष स्थानमा छ । पराजित इक्वेडर २ खेलमा अंकविहीन हुँदै तालिकाको पुछारमा छ ।